கோவை | கார் வெடிப்பு வழக்கு விவகாரத்தில் கைதான 5 பேரை கோவைக்கு அழைத்து வந்து என்ஐஏ அதிகாரிகள் விசாரணை

கோவை: கோவை கார் வெடிப்பு வழக்கு விவகாரம் தொடர்பாக, கைதானவர்களில் 5 பேரை கோவைக்கு அழைத்து வந்து என்ஐஏ அதிகாரிகள் விசாரணை நடத்தினர்.

கோவை கோட்டைமேடு சங்கமேஸ்வரர் கோயில் அருகே, கடந்த அக்.23-ல் கார் வெடிப்புச் சம்பவம் நடந்தது. இதில் காரை ஓட்டி வந்தஜமேஷா முபின்(25) என்பவர் உயிரிழந்தார். அவரது வீட்டிலிருந்து நாட்டு வெடிகுண்டு தயாரிக்கப் பயன்படும் ரசாயனம் உள்ளிட்ட பொருட்கள் பறிமுதல் செய்யப்பட்டன. மேலும், உயிரிழந்த முபின் ஐஎஸ்ஐஎஸ் தீவிரவாத இயக்கத்தினருடன் தொடர்பில் இருந்ததற்கான ஆதாரங்களும் சிக்கின.

இந்த வழக்கு தொடர்பாக கோவையைச் சேர்ந்த முகமது தல்கா(25), முகமது அசாருதீன்(23), முகமது ரியாஸ்(27) பெரோஸ் இஸ்மாயில்(26), முகமது நவாஸ் இஸ்மாயில்(26), அப்சர்கான்(28) ஆகியோர் கைது செய்யப்பட்டனர். பின்னர், சம்பவத்தின் முக்கியத்துவம் கருதி இந்த வழக்கு தேசிய புலனாய்வு முகமைக்கு (என்ஐஏ) மாற்றப்பட்டது. கைது செய்யப்பட்ட 6 பேரையும் தங்களது காவலில் எடுத்து என்ஐஏ அதிகாரிகள் விசாரித்தனர்.

பின்னர், கோவை மத்திய சிறையில் அடைக்கப்பட்டிருந்த 6 பேரும் சென்னை புழல் சிறைக்கு கடந்த 12-ம் தேதி மாற்றப்பட்டனர். மேலும், இந்த வழக்கு தொடர்பாக முகமது தவுபீக்(25), உமர் பாரூக்(39), பெரோஸ் கான்(28) ஆகிய மேலும் 3 பேர் கடந்த 7-ம் தேதி கைது செய்யப்பட்டனர். இந்நிலையில், கைது செய்யப்பட்டவர்களில் முகமது அசாருதீன், அப்சர்கான், பெரோஸ் இஸ்மாயில், உமர் பாரூக், பெரோஸ்கான் ஆகிய 5 பேரை 9 நாள் காவலில் எடுத்து விசாரிக்க என்ஐஏ அதிகாரிகள் அனுமதி பெற்றனர்.

பின்னர், அவர்களை தங்களது ரகசிய இடத்தில் வைத்து கார் வெடிப்பு சம்பவம் தொடர்பான கூடுதல் தகவல்களை கேட்டறிந்து என்.ஐ.ஏ அதிகாரிகள் விசாரணை நடத்தினர். அந்த விசாரணையின் ஒரு பகுதியாக, மேற்கண்ட 5 பேரையும் சென்னையில் இருந்து நேற்று காலை கோவைக்கு அழைத்து வந்தனர். அவர்களுடன் போலீஸாரும் வந்தனர். உக்கடம், ஜி.எம்.நகர், அல் அமீன் காலனி, கோட்டைமேடு உள்ளிட்ட இடங்களுக்கு அழைத்துச் சென்றனர்.

உயிரிழந்த முபினுடன் சேர்ந்து ஆலோசனை நடத்திய சாலையோர இடங்களில் அவர்களை நிற்க வைத்து விசாரித்தனர். கார் வெடிப்பு சம்பவம் தொடர்பான தகவல்களை அவர்களிடம் விசாரித்து என்ஐஏ அதிகாரிகள் உறுதி செய்து கொண்டனர். பின்னர், அவர்களை 5 பேரையும் அழைத்துச் சென்றனர்.