ஓசூரில் மழை வெள்ளத்தில் சிக்கிய 3 குழந்தைகள் உட்பட 8 பேர் மீட்பு

ஓசூர் குடியிருப்பு பகுதியில் மழை வெள்ளத்தில் சிக்கிய 3 குழந்தைகள் உட்பட8 பேர் பாதுகாப்பாக மீட்கப்பட்டனர்.

ஓசூர் மாநகராட்சிக்கு உட்பட்ட பேகேப்பள்ளி குடியிருப்பு பகுதியில் வசிப்பவர் கலைமோகன். இவரது நிலத்தில் கட்டிட வேலை செய்வதற்காக 3 குழந்தைகளுடன் 3 பெண்கள் மற்றும் 2 ஆண்கள் அங்கேயே தங்கி பணிபுரிந்து வருகின்றனர்.

இந்நிலையில், நேற்று முன்தினம் இரவு பெய்த மழையினால் பேகேப்பள்ளி-பாகூர் சாலையில் உள்ள சாக்கரை ஏரி நிரம்பி தண்ணீர் கலைமோகன் கட்டிடப் பகுதியில் சூழ்ந்தது. மேலும், இரவில் பெய்த மழையால் மழை நீரும் சூழ்ந்தது.

இதில், அந்த கட்டிடத்தில் தங்கியிருந்த 3 குழந்தைகள் உட்பட 8 பேரும் வெள்ள நீரில் சிக்கிக் கொண்டு இரவு முழுவதும் தூங்க முடியாமலும், உணவு தேவைக்காக வெளியே வரமுடியாமலும் சிரமத்துக்கு உள்ளாகினர்.

தகவல் அறிந்து அப்பகுதிக்கு நேற்று காலை சென்ற சிப்காட் போலீஸார் மற்றும் தீயணைப்பு வீரர்கள் பொக்லைன் உதவியுடன் கயிறு கட்டி 8 பேரையும் பாதுகாப்பாக மீட்டனர். பின்னர் அவர்களுக்கு முதலுதவி அளிக்கப்பட்டு, உணவு வழங்கப்பட்டது.