சென்னை: 'கலைஞர் நினைவு பன்னாட்டு மாரத்தான் போட்டி' ஆகஸ்ட் 7-ம் தேதி நடைபெறுகிறது. இப்போட்டிக்கான இறுதிப் பதிவை வேளச்சேரியில் நேற்று சுகாதாரத் துறை அமைச்சர் மா.சுப்பிரமணியன் தொடங்கி வைத்தார்.
சோழிங்கநல்லூர் தொகுதி எம்எல்ஏ எஸ்.அரவிந்த்ரமேஷ், மண்டலக் குழுத் தலைவர்பெருங்குடி எஸ்.வி.ரவிச்சந்திரன் ஆகியோர் உடன் இருந்தனர்.
அப்போது, அமைச்சர் மா.சுப்பிரமணியன் செய்தியாளர்களுக்கு அளித்தப் பேட்டி: மறைந்த முன்னாள் முதல்வர்கருணாநிதியின் நினைவைப் போற்றும்வகையில் 2020-ம் ஆண்டு ஆகஸ்ட் 6-ம்தேதி சென்னை அண்ணா அறிவாலயத்தில் திமுக தலைவர் மு.க.ஸ்டாலின்கலைஞர் நினைவு பன்னாட்டு மெய்நிகர்மாரத்தான் போட்டிக்கான இணையதளத்தை தொடங்கி வைத்தார்.
2020 ஆகஸ்ட் 7-ம் தேதி தொடங்கி ஆகஸ்ட் 31-ம் தேதி வரை நடைபெற்றமாரத்தானில் 28 நாடுகளிலிருந்து 8,541வீரர்கள் பங்கேற்றனர். பதிவுக் கட்டணமாக ரூ.300 வசூலிக்கப்பட்டது. வசூல்தொகை ரூ.23,41,726 கரோனா பேரிடர்நிவாரண உதவி நிதியாக அளிக்கப்பட்டது. இப்போட்டி ஆசியா புக் ஆஃப் ரெக்கார்ட்ஸ் புத்தகத்தில் இடம்பிடித்தது.
தொடர்ந்து 2-வது ஆண்டில் மாரத்தான் போட்டி 2021 ஆகஸ்ட் 7-ம் தேதி நடைபெற்றது. 38 நாடுகளிலிருந்து இம்மாரத்தான் போட்டியில் 19,596 பேர் பங்கேற்றனர். இதில் பெறப்பட்ட கட்டணத்தொகை ரூ.56,02,693 தமிழக முதல்வரிடம் கரோனா பேரிடர் நிவாரண நிதியாக வழங்கப்பட்டது.
தற்போது கருணாநிதியின் 4-ம் ஆண்டு நினைவு நாளையொட்டி, 3-ம்ஆண்டு மாரத்தான் போட்டி வரும் ஆகஸ்ட் 7-ம் தேதி நேரடியாக நடைபெறுவதால், 40 ஆயிரம் பேர் வரைஇதில் பங்கேற்பார்கள் என எதிர்பார்க்கிறோம். இப்போட்டியும் ஆசிய சாதனையைப் படைக்க இருக்கிறது.
5, 10, 21, 42 கிமீ என 4 பிரிவுகளில் போட்டிகள் நடைபெறவுள்ளன. ரூ.1 லட்சம் முதல் ரூ.10 ஆயிரம் வரை பரிசுகள் வழங்கப்படவுள்ளன. தமிழக முதல்வர் மு.க.ஸ்டாலின் ஆகஸ்ட் 7-ம் தேதி கருணாநிதி நினைவு நாளில் இப்பரிசுகளை வழங்குகிறார்.
இப்போட்டி பெசன்ட் நகரில் தொடங்கி மாநிலக் கல்லூரி வரை சென்று திரும்ப இருக்கிறது. 4 பிரிவுகளாக 40 ஆயிரம் பேர்பங்கேற்கும் இம்மாரத்தான் போட்டியில் ஓடுபவர்களை உற்சாகப்படுத்தி இசைக்கலைஞர்கள் இசை நிகழ்ச்சி நடத்த இருக்கிறார்கள்.
5 கிமீ போட்டியை திமுக இளைஞர் அணி செயலாளரும் சேப்பாக்கம் - திருவல்லிக்கேணி தொகுதி எம்எல்ஏவுமான உதயநிதி ஸ்டாலின் தொடங்கிவைக்கிறார். மற்ற பிரிவு போட்டிகளை அமைச்சர்கள் தொடங்கி வைக்கவுள்ளனர். இந்தாண்டு கிடைக்கும் கட்டண வசூல் தொகை ரூ.90 லட்சம் எழும்பூர் குழந்தைகள் நல மருத்துவமனை மற்றும் தாய் சேய்மருத்துவமனை ஆகிய 2 மருத்துவமனைகளுக்கும் கிராமப் புறங்களில் இருந்து வருகிற ஏழைத் தாய்மார்கள் பயன்பெறுகிற வகையில் அரங்கம் அமைப்பதற்கும், அறக்கட்டளை உருவாக்கி அதில் அந்த தொகையை பயன்படுத்துகிற வகையிலும் முதல்வர் மு.க.ஸ்டாலின் சுகாதாரத் துறைச் செயலாளரிடம் அதே மேடையில் ஒப்படைக்கவுள்ளார்.
இவ்வாறு அவர் தெரிவித்தார்.