முல்லைப் பெரியாறு கண்காணிப்பு குழு அமைப்பு: பிரதமருக்கு ஜெயலலிதா நன்றி

முல்லைப் பெரியாறு அணை தொடர்பாக உச்ச நீதிமன்ற உத்தரவை ஏற்று கண்காணிப்பு குழு அமைத்ததற்காக பிரதமர் நரேந்திர மோடிக்கு முதல்வர் ஜெயலலிதா நன்றி தெரிவித்துள்ளார்.

இதுதொடர்பாக பிரதமருக்கு புதன்கிழமை எழுதியுள்ள கடிதத்தில் ஜெயலலிதா கூறியிருப்பதாவது:

கடந்த மே 7-ம் தேதி உச்ச நீதிமன்றம் பிறப்பித்த உத்தரவின்படி, முல்லைப் பெரியாறு அணையின் நீர் மட்டத்தை உயர்த்துவது தொடர்பாக கண்காணிப்பு குழு ஒன்றை அமைப்பதற்கு மத்திய அமைச்சரவை புதன்கிழமை கூடி முடிவு எடுத்துள்ளது. இதற்கு நன்றி தெரிவித்துக் கொள்கிறேன்.

கடந்த ஜூன் 3-ம் தேதி தங்களை சந்தித்து அளித்த மனுவில் முல்லைப் பெரியாறு அணையின் நீர்மட்டத்தை 142 அடியாக உயர்த்துவதற்கு விரைந்து கண்காணிப்புக் குழு அமைக்குமாறு வேண்டுகோள் விடுத்திருந்தேன். தற்போது கண்காணிப்புக் குழு அமைப்பதற்கு மத்திய அமைச்சரவை அனுமதி அளித்திருப்பது, தமிழகத்தின் 5 மாவட்டங்களில் முல்லைப் பெரியாறு நீரை நம்பி விவசாயம் செய்யும் ஏராளமான விவசாயிகளுக்கு உதவிகரமாக இருக்கும். தங்களது இந்த உரிய நடவடிக்கைக்கு நன்றி.

இவ்வாறு கடிதத்தில் ஜெயலலிதா கூறியுள்ளார்.