ரத்தக்குழாய் நுண்துளை அறுவை சிகிச்சை முடிந்து ஆம்புலன்ஸில் பள்ளிக்கு வந்து பிளஸ் 2 தேர்வு எழுதிய மாணவி

திருப்பூர்: ரத்தக்குழாய் நுண்துளை அறுவை சிகிச்சை முடிந்து, ஆம்புலன்ஸில் வந்து திருப்பூரை சேர்ந்த அரசுப் பள்ளி மாணவி நேற்று பிளஸ் 2 தேர்வு எழுதினார்.

திருப்பூர் குப்பாண்டம்பாளை யத்தை சேர்ந்த அய்யனார், கீதா தம்பதியின் மகள் ரிதன்யா. இவர்,கணபதிபாளையம் அரசு மேல்நிலை பள்ளியில் பிளஸ் 2 படித்து வந்தார். இந்நிலையில், கடந்த 1-ம் தேதி ரிதன்யாவுக்கு திடீரென வயிற்று வலி ஏற்பட்டுள்ளது. திருப்பூர் - பல்லடம் சாலையிலுள்ள தனியார்மருத்துவமனையில் அனுமதிக்கப்பட்டார். அவரை பரிசோதித்த மருத்துவர்கள், வயிற்றில் ரத்தக்குழாயில் அடைப்பு ஏற்பட்டுள்ளதாக கூறியுள்ளனர். இதையடுத்து, இரண்டு நாட்களுக்கு முன்பு நுண்துளை அறுவை சிகிச்சை மேற்கொள்ளப்பட்டது. மாணவி நலமுடன்மருத்துவமனையில் இருந்தார்.

இதனிடையே, பிளஸ் 2 பொதுத்தேர்வு நேற்று தொடங்கிய சூழலில், தேர்வு எழுத வேண்டுமென பெற்றோர் மற்றும் மருத்துவரிடம் ரிதன்யா கூறியுள்ளார். மாணவியின் எதிர்கால நலனை கருத்தில்கொண்டு, மருத்துவரின் அறிவுரைப்படி ஆம்புலன்ஸ் மூலமாக சுமார் 4 கிலோ மீட்டர் தொலைவிலுள்ள கணபதிபாளையம் அரசு மேல்நிலை பள்ளிக்கு செவிலியர்கள் உதவியுடன் சென்று ரிதன்யா தேர்வு எழுதினார். உதவியாளர் யாருமின்றி தேர்வு எழுதியதைக் கண்டு சக மாணவிகள் மற்றும் பள்ளி ஆசிரியர்கள் பாராட்டினர்.