வள்ளியூர் - ஆரல்வாய்மொழி இடையே இரட்டைப் பாதை இணைப்பு பணியால் ரயில்கள் போக்குவரத்தில் மாற்றம்

திருநெல்வேலி: தெற்கு ரயில்வே மதுரை கோட்டம் வெளியிட்ட செய்திக் குறிப்பு: திருநெல்வேலி - நாகர்கோவில் பிரிவில் வள்ளியூர் - ஆரல்வாய்மொழி ரயில் நிலையங்களுக்கு இடையே இரட்டை ரயில் பாதை இணைப்பு வேலைகள் நடைபெறவுள்ளது. எனவே, இப் பகுதியில் ரயில் போக்குவரத்தில் சில மாற்றங்கள் செய்யப்பட்டுள்ளன.

அதன்படி திருச்சி - திருவனந்தபுரம் - திருச்சி இன்டர்சிட்டி விரைவு ரயில்(எண் 22627/22628) இன்று முதல் வரும்29-ம் தேதி வரை திருநெல்வேலி - திருவனந்தபுரம் ரயில் நிலையங்களுக்கு இடையே பகுதியாக ரத்து செய்யப்படுகிறது. இன்று முதல் 28-ம் தேதி வரைதாம்பரத்திலிருந்து இரவு 11 மணிக்கு புறப்பட வேண்டிய தாம்பரம் - நாகர்கோவில் அந்த்யோதயா விரைவு ரயில்(எண் 20691) திருநெல்வேலி - நாகர்கோவில் ரயில் நிலையங்களுக்கு இடையே பகுதியாக ரத்து செய்யப்படுகிறது.

மறுமார்க்கத்தில் நாளை (ஏப்ரல் 21) முதல் 29 -ம் தேதி வரை நாகர்கோவிலில் இருந்து பிற்பகல் 3.50 மணிக்கு புறப்பட வேண்டிய நாகர்கோவில் - தாம்பரம் அந்த்யோதயா விரைவு ரயில் (எண் 20692) நாகர்கோவில் - திருநெல்வேலி ரயில் நிலையங்களுக்கு இடையே பகுதியாக ரத்து செய்யப்படுகிறது. வரும் 24-ம் தேதி புதுச்சேரியிலிருந்து மதியம் 12 மணிக்கு புறப்பட வேண்டிய புதுச்சேரி - கன்னியாகுமரி விரைவு ரயில் (எண் 16861) மற்றும் வரும் 25-ம்தேதி கன்னியாகுமரியில் இருந்து மதியம் 1.50 மணிக்கு புறப்பட வேண்டிய கன்னியாகுமரி - புதுச்சேரி விரைவு ரயில் (எண் 16862) ஆகியவை திருநெல்வேலி - கன்னியாகுமரி இடையே பகுதியாக ரத்து செய்யப்படுகிறது.

வரும் 28-ம் தேதி சென்னையில் இருந்து மாலை 6.55 மணிக்கு புறப்பட வேண்டிய சென்னை எழும்பூர் - நாகர்கோவில் வாராந்திர விரைவு ரயில் (எண் 12667) மற்றும் வரும் 29-ம் தேதிநாகர்கோவிலில் இருந்து மாலை 4.15 மணிக்கு புறப்பட வேண்டிய நாகர்கோவில் - சென்னை எழும்பூர் வாராந்திரவிரைவு ரயில் ஆகியவை திருநெல்வேலி - நாகர்கோவில் இடையே பகுதியாக ரத்து செய்யப்படுகிறது.

வரும் 29-ம் தேதி கன்னியாகுமரி - சென்னை எழும்பூர் விரைவு ரயில் (எண் 12634) கன்னியாகுமரியில் இருந்து 45 நிமிடங்கள் தாமதமாக மாலை 5.50 மணிக்கு புறப்படும் என்று தெரிவிக்கப்பட்டுள்ளது.

இன்று முதல் 28-ம் தேதி வரை தாம்பரத்திலிருந்து இரவு 11 மணிக்கு புறப்பட வேண்டிய தாம்பரம் - நாகர்கோவில் அந்த்யோதயா விரைவு ரயில் (எண் 20691) திருநெல்வேலி - நாகர்கோவில் ரயில் நிலையங்களுக்கு இடையே பகுதியாக ரத்து செய்யப்படுகிறது.