ப.சிதம்பரம் சொந்த ஊரில் அதிகாரபூர்வ காங்கிரஸ் வேட்பாளரை வென்ற திமுக

முன்னாள் மத்திய அமைச்சர் ப.சிதம்பரம் சொந்த ஊரான சிவகங்கை மாவட்டம், கண்டனூர் பேரூராட்சியில் துணைத் தலைவர் தேர்தலில் அதிகாரப்பூர்வ காங்கிரஸ் வேட்பாளரை, திமுக வேட்பாளர் தோற்கடித்தார்.

கண்டனூர் பேரூராட்சியில் 15 வார்டுகள் உள்ளன. திமுக- 7, காங்கிரஸ், அதிமுக, அமமுக, சுயேச்சைகள் தலா 2 இடங்களை வென்றன. திமுக கூட்டணிக்கு பெரும்பான்மை உள்ள நிலையில் தலைவர் பதவிக்கு 6-வது வார்டு திமுக கவுன்சிலர் சங்கீதாவும், துணைத் தலைவர் பதவிக்கு 8-வது வார்டு காங்கிரஸ் கவுன்சிலர் நடராஜனும் அறிவிக்கப்பட்டனர்.

கண்டனூர் பேரூராட்சி அலுவலகத்தில் நேற்று காலை நடந்த தலைவர் தேர்தலில் திமுக கவுன்சிலர் சங்கீதா போட்டியின்றி தேர்வானார். ஆனால், பிற்பகலில் நடந்த துணைத் தலைவர் தேர்தலில், காங்கிரஸ் கவுன்சிலர் நடராஜனை எதிர்த்து 1-வது வார்டு திமுக கவுன்சிலர் மீனா போட்டியிட்டார்.

இதில் மீனா 10 வாக்குகள் பெற்று வெற்றி பெற்றார். நடராஜன் 2 வாக்குகள் மட்டுமே பெற்றார். முன்னாள் மத்திய அமைச்சர் ப.சிதம்பரம் சொந்த ஊரில் துணைத் தலைவர் தேர்தலில் அதிகாரப்பூர்வ காங்கிரஸ் வேட்பாளரை, திமுக வேட்பாளர் வென்றது காங்கிரஸார் இடையே அதிர்ச்சியை ஏற்படுத்தியது.