அப்போலோ மருத்துவர்கள் 10 பேருக்கு சம்மன் ஆறுமுகசாமி ஆணையத்தின் விசாரணை மீண்டும் தொடக்கம்

ஜெயலலிதா மரணம் குறித்து விசாரணை நடத்தி வரும் ஆறுமுகசாமி ஆணையம், அப்போலோ மருத்துவர்கள் 10 பேருக்கு சம்மன் அனுப்பியுள்ளது. ஆணையத்தின் விசாரணை வரும் 7-ம் தேதி முதல் மீண்டும் தொடங்குகிறது.

மறைந்த முன்னாள் முதல்வர் ஜெயலலிதா மரணம் குறித்து ஓய்வுபெற்ற நீதிபதி ஆறுமுகசாமி தலைமையிலான ஆணையம் விசாரணை மேற்கொண்டு வருகிறது. இதுவரை 154 பேரிடம் விசாரணை நிறைவு பெற்றுள்ளது.

விசாரணை இறுதிக்கட்டத்தை அடைந்த நிலையில், 2019-ல் இந்த வழக்கில் உரிய மருத்துவக் குழுவை கொண்டு விசாரணை மேற்கொள்ளவில்லை என்று அப்போலோ மருத்துவமனை நிர்வாகம் சார்பில் உச்ச நீதிமன்றத்தில் வழக்கு தொடரப்பட்டது. இதையடுத்து, இந்த ஆணைத்தின் விசாரணைக்கு இடைக்கால தடையை நீதிமன்றம் விதித்தது. தற்போது ஆணையம் தொடர்ந்து விசாரணை நடத்த நீதிமன்றம் அனுமதி அளித்துள்ளது.

ஜெயலலிதா மரணம் தொடர்பான விசாரணை நடத்தும் ஆறுமுகசாமி ஆணையத்துக்கு உதவ, மருத்துவக் குழுவை அமைக்குமாறு எய்ம்ஸ் மருத்துவமனைக்கு கடந்த மாதம் உச்ச நீதிமன்றம் உத்தரவு பிறப்பித்திருந்தது. இதையடுத்து எய்ம்ஸ் மருத்துவர் நிகில் டாண்டன் தலைமையில் 6 பேர் கொண்ட மருத்துவர்கள் குழு எய்ம்ஸ் சார்பில் அமைக்கப்பட்டுள்ளது. அடுத்தகட்ட நடவடிக்கை குறித்து மருத்துவர்கள், சசிகலா மற்றும் அப்போலோ மருத்துவமனை தரப்பு வழக்கறிஞர்களுடன் ஆறுமுகசாமி ஆணையம் கடந்த 16-ம் தேதி ஆலோசனை நடத்தியது.

அதைத் தொடர்ந்து, அப்போலோ மருத்துவர்கள் 10 பேருக்கு ஆறுமுகசாமி ஆணையம் சம்மன் அனுப்பியுள்ளது. வரும் 7 மற்றும் 8-ம் தேதிகளில் விசாரணைக்கு நேரில் ஆஜராகுமாறு சம்மனில் கூறப்பட்டுள்ளது. கடந்த 2 ஆண்டுகளாக விசாரணை நடைபெறாத நிலையில், வரும் 7-ம் தேதி முதல் மீண்டும் விசாரணை தொடங்க உள்ளது. ஆணையத்தின் விசாரணை 90 சதவீதம் முடிவடைந்துவிட்டது. மேலும், அப்போலோ மருத்துவர்களிடம் நடத்தப்படும் விசாரணையின்போது எய்ம்ஸ் மருத்துவர்களும் காணொலி மூலமாக பங்கேற்பார்கள் என்று கூறப்படுகிறது.