நகர்ப்புற உள்ளாட்சி தேர்தல் பணியாற்றும் வாக்குச்சாவடி அலுவலர்களுக்கு இன்று 2-ம் கட்ட பயிற்சி

சென்னை: நகர்ப்புற உள்ளாட்சி தேர்தலில் வாக்குச்சாவடி அலுவலர்களாக பணியாற்ற உள்ள 1 லட்சத்து 33 ஆயிரம் பேருக்கு இன்று 2-ம் கட்ட தேர்தல் பயிற்சி வழங்கப்பட உள்ளது.

தமிழகத்தில் 21 மாநகராட்சிகள், 138 நகராட்சிகள், 489 பேரூராட்சிகள் என மொத்தம் 648 நகர்ப்புற உள்ளாட்சிகளுக்கு பிப்.19-ம் தேதிஒரே கட்டமாக தேர்தல் நடைபெறுகிறது. காலை 7 முதல் மாலை 6 மணி வரை வாக்குப்பதிவு நடைபெறும். இதில் 2 கோடியே 79 லட்சத்து 56 ஆயிரத்து 754 வாக்காளர்கள் வாக்களிக்க உள்ளனர். சென்னை மாநகராட்சியில் மட்டும் 61 லட்சத்து 18 ஆயிரத்து 734 வாக்காளர்கள் உள்ளனர்.

31,029 வாக்குச் சாவடிகள்

இத்தேர்தலில் 31 ஆயிரத்து29 வாக்குச் சாவடிகள் இடம்பெற்றுள்ளன. அதிகபட்சமாக சென்னைமாநகராட்சியில் 5 ஆயிரத்து 794வாக்குச் சாவடிகள் இடம்பெற்றுள்ளன. ஒரு வாக்குச்சாவடிக்கு 4 வாக்குப்பதிவு அலுவலர்கள் என மொத்தம் 1 லட்சத்து 33 ஆயிரம் அலுவலர்கள் வாக்குப்பதிவு பணியில் ஈடுபடுத்தப்பட உள்ளனர். இவர்களுக்கான முதற்கட்ட பயிற்சி கடந்த 31-ம் தேதி நடை பெற்றது.

இப்பயிற்சியில் பங்கேற்காதவர்களுக்கு கடந்த 5-ம் தேதி பயிற்சி வழங்கப்பட்டது. 2-ம் கட்டபயிற்சி இன்று 234 இடங்களில் நடைபெற உள்ளது. இதில் வாக்காளர்களின் வாக்காளர் அட்டையை பரிசோதித்தல், வாக்குப்பதிவு இயந்திரங்களை கையாளுதல் உள்ளிட்ட பயிற்சி கள் வழங்கப்பட உள்ளன.