சென்னை அதிமுகவினரிடம் இன்று நேர்காணல்

சட்டப்பேரவை தேர்தலில் அதிமுக சார்பில் போட்டியிட விருப்ப மனு அளித்தவர்களுக்கான 2-ம் கட்ட நேர்காணல் நடந்து வருகிறது. 11-ம் நாளான நேற்று தருமபுரி, கிருஷ்ணகிரி, விழுப்புரம், திருவண்ணாமலை,கடலூர், புதுச்சேரியில் போட்டியிட விருப்ப மனு அளித்தவர்கள் அழைக்கப்பட்டிருந்தனர்.

காலை 11.20 மணிக்கு தருமபுரி, கிருஷ்ணகிரி, விழுப்புரத்தைச் சேர்ந்தவர்கள் நேர்காணலில் பங்கேற்றனர். பிற்பகல் கடலூர், திருவண்ணாமலை மாவட்டங்களுக்கு நேர்காணல் நடந்தது. அதைத் தொடர்ந்து 12-வது நாளாக இன்றும் நேர்காணல் தொடர்கிறது. நேற்றைய நேர்காணலில் விடுபட்டவர்கள், சென்னை மாவட்டத்தினர் மற்றும் புதுச்சேரி, கேரள மாநிலங்களைச் சேர்ந்தவர்கள் இதில் பங்கேற்பார்கள் என கூறப்படுகிறது. இது தொடர்பாக அதிமுக நிர்வாகி ஒருவர் கூறும்போது, ‘‘சென்னையை பொறுத்தவரை, கடந்த மாதம் 6-ம் தேதி நடந்த முதல்கட்ட நேர்காணலின்போது, பெரம்பூர் தொகுதிக்கு வெற்றிவேலும், மயிலாப்பூர் தொகுதிக்கு கவுன்சிலர் நூர்ஜகானும் அழைக்கப்பட்டனர். தற்போது மீதமுள்ள ராயபுரம், துறைமுகம், சைதாப்பேட்டை, தி.நகர், விருகம்பாக்கம், எழும்பூர், அண்ணாநகர் உள்ளிட்ட 14 தொகுதிகளுக்கும் விருப்ப மனு அளித்தவர்களுக்கு நேர்காணல் நடக்கும்’’ என்றார்.