Published : 27 Dec 2021 08:15 AM
Last Updated : 27 Dec 2021 08:15 AM
சென்னை: `இந்து தமிழ் திசை' செய்தி எதிரொலியாக, சென்னையில் வரலாற்றுச் சின்னங்கள் இடம்பெற்ற சாலை பெயர்ப் பலகையில் மண்டலம், வார்டு விவரங்கள் இணைக்கப்பட்டுள்ளன.
`சிங்காரச் சென்னை 2.0' திட்டத்தின் கீழ், சென்னை மாநகராட்சியில் பல்வேறு திட்டங்களை தமிழக அரசு செயல்படுத்த உள்ளது.
இதன் ஒரு பகுதியாக, வரலாற்றுச் சின்னங்களின் புகைப்படங்கள் அடங்கிய சாலை பெயர்ப் பலகைகளை வைக்க மாநகராட்சி முடிவு செய்தது.
முதல்கட்டமாக, சென்னை தேனாம்பேட்டை எல்டாம்ஸ் சாலை, கவிஞர் பாரதிதாசன் சாலை உள்ளிட்ட பகுதிகளில், வரலாற்றுச் சின்னங்கள் இடம்பெற்ற பெயர்ப் பலகைகள் வைக்கப்பட்டுள்ளன.
இவற்றில் தலைமைச் செயலகம், திருவல்லிக்கேணி பார்த்தசாரதி கோயில், சாந்தோம் தேவாலயம், விவேகானந்தர் இல்லம் உள்ளிட்ட சென்னையின் வரலாற்றுச் சிறப்புமிக்க இடங்களின் புகைப்படங்கள் இடம் பெற்றுள்ளன.
இருப்பினும், இவற்றில் மண்டலம், வார்டு உள்ளிட்ட விவரங்கள் குறிப்பிடப்படவில்லை. எனவே, அவற்றைக் குறிப்பிட வேண்டும் என்று பொதுமக்கள் கோரிக்கை விடுத்தனர். இது தொடர்பாக கடந்த 16-ம் தேதி வெளியான `இந்து தமிழ் திசை' நாளிதழில் விரிவான செய்தி வெளியானது.
இதையடுத்து, சென்னை தேனாம்பேட்டையில் உள்ள கவிஞர் பாரதிதாசன் சாலை பெயர்ப் பலகையில் வார்டு, மண்டலம் உள்ளிட்ட விவரங்கள் புதிதாக சேர்க்கப்பட்டுள்ளன.
இதேபோல, பிற புதிய பெயர்ப் பலகையிலும் வார்டு, மண்டலம் விவரங்களை இணைக்கும் பணியில் மாநகராட்சி அதிகாரிகள் ஈடுபட்டு வருகின்றனர்.
Sign up to receive our newsletter in your inbox every day!
WRITE A COMMENT