கரோனா தொற்று: கமலிடம் நலம் விசாரித்த ரஜினி

கரோனா தொற்றால் பாதிக்கப்பட்ட கமல்ஹாசனின் உடல்நிலை குறித்து நடிகர் ரஜினிகாந்த் அவரிடம் போனில் நலம் விசாரித்துள்ளார்.

நடிகரும், மக்கள் நீதி மய்யம் கட்சியின் தலைவருமான கமல்ஹாசனுக்கு நேற்று கரோனா தொற்று உறுதி செய்யப்பட்டது. அமெரிக்கா சென்று திரும்பிய பின்னர் தனக்குத் தொற்று ஏற்பட்டுள்ளதாக அவர் தனது ட்விட்டர் பக்கத்தில் தெரிவித்திருந்தார். இதனைத் தொடர்ந்து அவர் சென்னையில் உள்ள ஸ்ரீ ராமச்சந்திரா மருத்துவமனையில் அனுமதிக்கப்பட்டு சிகிச்சை பெற்று வருகிறார்.

கமல்ஹாசனின் உடல்நிலை சீராக உள்ளதாக ராமச்சந்திரா மருத்துவமனை நிர்வாகம் நேற்று மாலை அறிக்கை வெளியிட்டது.

தமிழக முதல்வர் ஸ்டாலின், சீமான் உள்ளிட்ட அரசியல் தலைவர்களும், திரையுலக பிரபலங்கள் பலரும் கமல்ஹாசன் விரைந்து குணமடைய வேண்டி வாழ்த்து தெரிவித்தனர்.

இந்நிலையில் கமல்ஹாசனின் உடல்நிலை குறித்து நடிகர் ரஜினிகாந்த் இன்று (நவ.22) அவரிடம் போனில் நலம் விசாரித்துள்ளார். விரைவில் குணமடைந்து கமல் வீடு திரும்பவும் ரஜினிகாந்த் அவரிடம் வாழ்த்து தெரிவித்துள்ளார்.