ஐ.சி.ஏ.ஆர். தேர்வில் திண்டுக்கல்லைச் சேர்ந்த அ.ஓவியா தேசிய அளவில் 2-ம் இடத்தையும், தமிழக அளவில் முதலிடத்தையும் பெற்று சாதனை படைத்துள்ளார்.
இந்திய வேளாண் ஆராய்ச்சிக் குழுமம் (ஐசிஏஆர்) ஆண்டுதோறும் பி.வி.எஸ்சி. (கால்நடை மருத்துவர்) படிப்பு முடித்தவர்கள் மேற்படிப்பான எம்.வி.எஸ்சி.யில் சேர தேசிய அளவில் தேர்வு நடத்துகிறது. இத்தேர்வு செப்.17-ல் நடந்தது. இதில் திண்டுக்கல்லைச் சேர்ந்த அ.ஓவியா, தேசிய அளவில் 2-ம் இடத்தையும், தமிழக அளவில் முதலிடத்தையும் பெற்று சாதனை படைத்தார். இவர், திருநெல்வேலியில் உள்ள கால்நடை மருத்துவக் கல்லூரி மற்றும் ஆராய்ச்சி நிலையத்தில் பி.வி.எஸ்சி. படித்தவர் ஆவார்.
இதுகுறித்து மாணவி அ.ஓவியா கூறியது: ஐசிஏஆர்தேர்வு எழுதி வெற்றிபெறுவதன் மூலம் கால்நடை டாக்டர் மேற்படிப்புக்கு இந்திய அளவில் உள்ள சிறந்த கல்லூரியை தேர்ந்தெடுக்கலாம்.
பி.வி.எஸ்சி. படித்தபோதே பாடங்களை ஆழ்ந்து படித்தேன். ஐசிஏஆர் தேர்வுக்கு விண்ணப்பித்தவுடன் முழுமையாக 2 மாதங்கள் தேர்வுக்குத் தயாரானேன். அடிப்படை புரிதலுடன் படித்ததால் வெற்றிபெற முடிந்தது.
ஏற்கெனவே இத்தேர்வை எழுதி வெற்றிபெற்றவர்கள் எனக்கு வழிகாட்டினர் என்றார். மாணவி ஓவியாவுக்கு தெலங்கானா ஆளுநரும், புதுவை துணைநிலை ஆளுநருமான தமிழிசை சவுந்தர ராஜன் வாழ்த்து தெரிவித்தார்.