பல மாதமாக கிடப்பில் போடப்பட்ட பட்டாபிராம் ரயில்வே மேம்பால பணி: போக்குவரத்து நெரிசலில் சிக்கி தவிக்கும் வாகன ஓட்டிகள்

ஆவடி அருகே பட்டாபிராம், சி.டி.எச். சாலையில் உள்ள ரயில்வே கடவுப்பாதையை கடந்து, பட்டாபிராம் மிலிட்டரி சைடிங்குக்கு நாள்தோறும் 20-க்கும் மேற்பட்ட ரயில்கள் சென்று திரும்புகின்றன. ஆகவே, இந்த கடவுப்பாதை முக்கால் மணி நேரத்துக்கு ஒருமுறைமூடப்படுவதால், கடவுப்பாதையின் இருபுறமும் வாகனங்கள் நூற்றுக்கணக்கில் நீண்ட வரிசையில் அணிவகுத்து நிற்கின்றன.

இதைத் தவிர்க்கும் வகையில், கடந்த 2010-11-ம் நிதியாண்டில் பட்டாபிராம் பகுதியில் ரூ.33.48 கோடி மதிப்பில் 4 வழிச்சாலையாக ரயில்வே மேம்பாலம் அமைக்க, ரயில்வே, நெடுஞ்சாலை துறை சார்பில் நிதி ஒதுக்கப்பட்டது.

பல ஆண்டுகளாக செயல்பாட்டுக்கு வராமல் கிடப்பில் கிடந்தஅத்திட்டம் தொடர்பாக, ரயில்வேமற்றும் நெடுஞ்சாலைத் துறையினரால் மறு ஆய்வு செய்யப்பட்டு, ரூ.52.11 கோடி மதிப்பில் 6 வழிச்சாலை மேம்பாலம் அமைக்க முடிவு செய்யப்பட்டது.

அதன்படி, 2018-ம் ஆண்டு தொடங்கப்பட்ட பட்டாபிராம் ரயில்வே மேம்பாலம் அமைக்கும் பணி, கடந்த பல மாதங்களாக கிடப்பில் உள்ளதால் வாகனப் போக்குவரத்து நெரிசல் தொடர் கதையாக உள்ளது.

இதுகுறித்து, சமூக ஆர்வலர்கள், பொதுமக்கள் தெரிவித்ததாவது: பட்டாபிராம் ரயில்வே மேம்பாலம் பணியை 18 மாதங்களில் முடிக்க திட்டமிடப்பட்டது. ஆனால், கடந்த பல மாதங்களாக எந்த பணிகளும் நடைபெறாமல் கிடப்பில் போடப்பட்டுள்ளது. இதனால், திருவள்ளூர், ஆவடி உள்ளிட்ட பகுதிகளுக்கு செல்லும் பஸ்கள், லாரிகள் உள்ளிட்ட வாகனங்கள் சுமார் 6 கி.மீ. தூரம் சுற்றி செல்ல வேண்டிய நிலை தொடர்ந்து வருகிறது. ஆகவே, இனியாவது பட்டாபிராம் ரயில்வே மேம்பால பணியைமீண்டும் தொடங்கி, துரிதமாக முடிக்க சம்பந்தப்பட்ட அதிகாரிகள்நடவடிக்கை எடுக்க வேண்டும். இவ்வாறு அவர்கள் தெரிவித்தனர்.

இதுகுறித்து, நெடுஞ்சாலைத் துறை அதிகாரி ஒருவர் கூறியதாவது:

கடவுப்பாதையின் இருபுறமும் அணுகுசாலை அமைத்தல்உள்ளிட்டவற்றுக்காக நிலங்கள் கையகப்படுத்தும் பணி இன்னும் முடிவடையவில்லை. அதேபோல், மேம்பாலம் அமைக்கும் பணிக்குஇடையூறாக உள்ள மின் கம்பங்களை அகற்ற வேண்டியுள்ளது. இப்பணிகள் முடிவுக்கு வந்த உடன், மேம்பாலம் அமைக்க தொடங்கி, 4 மாதங்களில் முடிவுக்கு வரும் என்றனர்.