சிவகாசி: சிவகாசி பட்டாசு ஆலைகளில் தீபாவளி உற்பத்தி நேற்றுடன் நிறைவடைந்தது. கடைசி நேரத்தில் விற்பனை சூடு பிடித்து 70 சதவீத பட்டாசுகள் விற்பனையானதால வியாபாரிகள் நிம்மதி அடைந்துள்ளனர்.
தீபாவளி பண்டிகையை மையமாக வைத்து சிவகாசி பகுதியில் உள்ள 1,100-க்கும் மேற்பட்ட பட்டாசு ஆலைகளில் ஆண்டு முழுவதும் பட்டாசு உற்பத்தி செய்யப்படுகிறது. நாட்டின் மொத்தத் தேவையில் 90 சதவீதத்துக்கும் அதிகமான பட்டாசுகள் சிவகாசியில் உற்பத்தி செய்யப்படுகின்றன. இந்த ஆண்டு தொடக்கம் முதலில் ஏற்பட்ட பட்டாசு ஆலை வெடி விபத்துகள் மற்றும் பல்வேறு கட்டுப்பாடுகள் காரணமாக பட்டாசு உற்பத்தி பாதிக்கப்பட்டது.
இரு மாதங்களுக்கு முன் உரிமம் நிறுத்திவைக்கப்பட்ட 300- க்கும் மேற்பட்ட பட்டாசு ஆலைகள் மீதான நடவடிக்கை விலக்கிக் கொள்ளப்பட்டதை அடுத்து அவற்றில் உற்பத்தி மும்முரமாக நடைபெற்றது. இறுதிக்கட்டப் பணிகள் முடிந்து உற்பத்தி செய்யப்பட்ட பட்டாசுகள் அனைத்தும் விற்பனைக்கு அனுப்பி வைக்கப்பட்டதை அடுத்து, நேற்றுடன் பட்டாசு உற்பத்தி நிறைவடைந்தது.
சிவகாசி பகுதியில் உள்ள பட்டாசுக் கடைகளில் ஆடிப்பெருக்கு அன்று சிறப்பு பூஜைகளுடன் தீபாவளி விற்பனை தொடங்கியது. விஜயதசமி தொடர் விடுமுறைக் காலத்தில் பட்டாசு விற்பனை சூடுபிடித்த நிலையில், அதன்பின் வெளியூர் மக்கள் வருகை குறைந்ததால் விற்பனை மந்தமானது. இந்நிலையில் நவம்பர் மாதத் தொடக்கம் முதலே வெளியூர் மக்கள் வருகை அதிகரித்து வருவதால் விற்பனையாளர்கள் மகிழ்ச்சி அடைந்துள்ளனர்.
இது குறித்து பட்டாசு விற்பனையாளர்கள் கூறுகையில் “தமிழகத்தில் விருதுநகர் மாவட்டத்தில் மட்டுமே நிரந்தர பட்டாசு விற்பனைக் கடைகள் மற்றும் குடோன்களுக்கு அனுமதி வழங்கப்படுவதால் மாநிலத்தின் பல்வேறு பகுதிகளைச் சேர்ந்தோர் சிவகாசியில் பட்டாசுக் கடைகள் தொடங்குகின்றனர். இதனால் ஆண்டுக்கு 500 முதல் 700 வரை புதிய கடைகளுக்கு அனுமதி வழங்கப்படுகிறது.
கடைகள் எண்ணிக்கை அதிகரித்தது மற்றும் ஆன்லைன் விற்பனை காரணமாக பட்டாசு விற்பனை குறைந்துள்ளது. கடைசி நேரத்தில் விற்பனை சூடு பிடித்ததால் 70 சதவீத பட்டாசுகள் விற்பனையாகியுள்ளன. இந்த ஆண்டு நவம்பரில் தீபாவளி வருவதால் மாநிலத்தின் பிற பகுதிகளில் விற்பனை நன்றாக இருக்கும்“, என்றனர்.
