Published : 16 Dec 2020 03:15 am

Updated : 16 Dec 2020 07:13 am

 

Published : 16 Dec 2020 03:15 AM
Last Updated : 16 Dec 2020 07:13 AM

பத்திரிகைகள் மீதான அவதூறு வழக்குகளை ரத்து செய்து தனி நீதிபதி பிறப்பித்த உத்தரவுக்கு இடைக்கால தடை- சென்னை உயர் நீதிமன்றம் உத்தரவு

madras-high-court

சென்னை

பத்திரிகைகள் மீதான அவதூறு வழக்குகளை ரத்து செய்து தனி நீதிபதி பிறப்பித்த உத்தரவுக்கு இடைக்காலத் தடை விதித்து சென்னை உயர் நீதிமன்றம் உத்தரவிட்டுள்ளது.

தமிழக முன்னாள் முதல்வர் ஜெயலலிதா மற்றும் தமிழக அரசுகுறித்து பல்வேறு அரசியல் தலைவர்கள் தெரிவித்த கருத்துகள், அவர்களது பேச்சுகளை வெளியிட்டதற்காக தமிழக முதல்வர், அமைச்சர்கள் சார்பில் ‘தி இந்து’, ‘டைம்ஸ் ஆஃப் இந்தியா’, ‘தினமலர்’, ‘தினகரன்’, ‘முரசொலி’ உள்ளிட்ட நாளிதழ்கள், ‘நக்கீரன்’ இதழ் ஆகியவற்றின் ஆசிரியர்கள், நிர்வாகிகள் மீது அவதூறு வழக்குகள் தொடரப்பட்டன. குறிப்பாக,கடந்த 2012-ம் ஆண்டு பிறப்பிக்கப் பட்ட அரசாணைப்படி முரசொலி மீது 20 வழக்குகளும், பிற நாளிதழ் கள் மீது தலா 2 வழக்குகளும் தொடரப்பட்டன.


இந்த அவதூறு வழக்குகளை ரத்து செய்யக் கோரி ‘தி இந்து’ சார்பில் என்.ராம், கோலப்பன், பத்மநாபன், சித்தார்த் வரதராஜன், ‘டைம்ஸ் ஆஃப் இந்தியா’ தரப்பில் சுனில் நாயர், சந்தானகோபாலன், ‘தினமலர்’ தரப்பில் ஆர்.கிருஷ்ண மூர்த்தி, ‘முரசொலி’ தரப்பில் செல்வம், ‘தினகரன்’ தரப்பில் ஆர்எம்ஆர் ரமேஷ், ‘நக்கீரன்’ தரப்பில் கோபால் ஆகியோர் மனுக்கள் தாக்கல் செய்தனர்.

இந்த மனுக்களை விசாரித்த நீதிபதி அப்துல் குத்தூஸ், ‘‘ஜனநாயகத்தின் தூண்களில் ஒன்றான பத்திரிகைகள் தங்கள் கடமையை செய்கின்றன. இதற்காக அவதூறு வழக்குகள் தொடரப்பட்டிருப்பது கருத்துரிமையை பறிப்பதாகும்’’ என்று கூறி, அவதூறு வழக்குகளை ரத்து செய்து தீர்ப்பளித்தார். இதை எதிர்த்து அரசு சார்பில் உயர் நீதிமன்றத்தில் மேல் முறையீடு செய்யப்பட்டது.

நீதிபதிகள் வினீத் கோத்தாரி, எம்.எஸ்.ரமேஷ் அமர்வில் இந்த மேல்முறையீட்டு வழக்கு நேற்று விசாரணைக்கு வந்தது.

அப்போது தமிழக அரசு சார்பில், ‘‘நாளிதழ்கள் மீது தொடரப்பட்ட அவதூறு வழக்குகளை தனி நீதிபதிமுறையாக பரிசீலிக்காமல் ரத்துசெய்துள்ளார். இந்த வழக்குகள் தொடர்பாக அரசு தகுந்த உத்தரவுகளை பிறப்பித்துள்ளது. எனவே, தனி நீதிபதி பிறப்பித்த உத்தரவுக்கு தடை விதிக்க வேண்டும்’’ என்று வாதிடப்பட்டது.

இதையடுத்து நீதிபதிகள், நாளிதழ்கள் மீதான அவதூறு வழக்குகளை ரத்து செய்து தனி நீதிபதி பிறப்பித்த உத்தரவுக்கு இடைக்காலத் தடை விதித்து உத்தரவிட்டுள்ளனர்.



பத்திரிகைகள் மீதான அவதூறு வழக்குதனி நீதிபதி பிறப்பித்த உத்தரவுஉத்தரவுக்கு இடைக்கால தடைசென்னை உயர் நீதிமன்றம் உத்தரவுMadras high court

Sign up to receive our newsletter in your inbox every day!

More From This Category

More From this Author

x