வன்னியருக்கு 20% தனி இட ஒதுக்கீடு கோரி சென்னையில் பாமக 3-வது நாளாக போராட்டம்

கல்வி, வேலைவாய்ப்பில் வன்னியர்களுக்கு 20 சதவீத தனி இட ஒதுக்கீடு வழங்கக் கோரி பாமக சார்பில் சென்னையில் 3-வது நாளாக நேற்று போராட்டம் நடத்தப்பட்டது.

தமிழகத்தில் கல்வி, வேலைவாய்ப்பில் வன்னியர்களுக்கு 20 சதவீத தனி இட ஒதுக்கீடு வழங்க வலியுறுத்தி பாமக, வன்னியர் சங்கம் சார்பில் டிச.1-ம் தேதி முதல் தொடர் போராட்டம் நடத்தப்படும் என்று பாமக நிறுவனர் ராமதாஸ் ஏற்கெனவே அறிவித்திருந்தார். அதன்படி, கடந்த 1-ம் தேதி சென்னையில் மன்றோ சிலை அருகே போராட்டம் நடத்தப்பட்டது. 2-வது நாளாக சென்னையில் உள்ள வள்ளுவர் கோட்டம் அருகே போராட்டம் நடைபெற்றது.

இந்நிலையில், 3-வது நாளான நேற்று சென்னை சேப்பாக்கத்தில் உள்ள விருந்தினர் மாளிகை அருகே போராட்டம் நடத்தப்பட்டது. இதில், பாமக தலைவர் ஜி.கே.மணி, வடக்கு மண்டல இணை பொதுச் செயலாளர் ஏ.கே.மூர்த்தி உட்பட நூற்றுக்கணக்கானோர் பங்கேற்று கோரிக்கையை வலியுறுத்தி கோஷம் எழுப்பினர்.