Published : 22 Feb 2020 21:49 pm

Updated : 22 Feb 2020 21:49 pm

 

Published : 22 Feb 2020 09:49 PM
Last Updated : 22 Feb 2020 09:49 PM

ஸ்டாலின் பிறந்த நாள் விவசாயிகள் பாதுகாப்பு தினமாகக் கொண்டாடப்படும்: திமுக விவசாய அணியின் 7 தீர்மானங்கள் 

stalin-s-birthday-to-be-celebrated-as-farmers-day

சென்னை

திமுக தலைவர் ஸ்டாலின் பிறந்த நாளை விவசாயிகளின் பாதுகாப்பு தினமாகக் கருதி வருகிற மார்ச் 1-ம் தேதி முதல் 7-ம் தேதி வரை தமிழகத்தின் அனைத்து ஒன்றியங்களிலும் பிறந்த நாள் சிறப்பு நிகழ்ச்சிகளை நடத்த திமுக விவசாய அணி தீர்மானம் நிறைவேற்றியுள்ளது.

திமுக விவசாய அணி மாவட்ட அமைப்பாளர் - துணை அமைப்பாளர்கள் கலந்துரையாடல் கூட்டம் இன்று சென்னை, தேனாம்பேட்டை, அண்ணாசாலையில் உள்ள அன்பகம் அண்ணா மன்றத்தில் நடைபெற்றது. இதற்கு திமுக விவசாய அணி செயலாளர் கே.பி. ராமலிங்கம் தலைமை வகித்தார்.

இதில் விவசாய அணி செயலாளர்கள் கரூர் ம.சின்னசாமி, ஏ.கே.எஸ்.விஜயன் ஆகியோர் முன்னிலையில், இணை செயலாளர்கள் எஸ்.அப்துல்காதர், ஆர்.அருட்செல்வன், கள்ளிப்பட்டி மணி, பா.செந்தமிழ்செல்வன், துணைத் தலைவர் டி.மதியழகன், துணை செயலாளர்கள் ஆர்.டி.ஏ.ஆதிசேசன், மதுரை ஆர். கணேசன், டேம் டி.வெங்கடேசன், ஜித்து (எ) ராசரத்தினம் கீழப்பாவூர் கு.செல்லப்பா, வி.என். மணி ஆகியோர் கருத்துரை வழங்கினர்.

இக்கூட்டத்தில் நிறைவேற்றப்பட்ட தீர்மானங்கள்:

தீர்மானம் -1 :

தமிழகத்தில் தமிழக அரசால் அறிவிக்கப்பட்ட வேளாண் பாதுகாப்பு மண்டலம், காவிரி டெல்டா மாவட்டங்கள் முழுவதும் பயன்படத்தக்க வகையில் அறிவிக்காமல், திருச்சி, கரூர், அரியலூர் மாவட்டங்கள் தவிர்த்திருப்பதும், பாதுகாப்பு மண்டல பகுதியில் ஏற்கெனவே அறிவிக்கப்பட்டுள்ள திட்டங்களுக்கு அது விவசாய விளைநிலங்களை நஞ்சாக்கி நாசப்படுத்தும் திட்டங்களாக இருந்தாலும், அதற்கு விதிவிலக்கு அளித்திருப்பதும் - விவசாய நிலங்களை ரியல் எஸ்டேட் தொழிலுக்கு பயன்படுத்த வகை செய்யப்பட்டிருப்பதும், முழுமையான பாதுகாக்கப்பட்ட வேளாண் மண்டல சட்டமாக இருக்க முடியாது என்பதால் முழுமையான பாதுகாக்கப்பட்ட வேளாண் மண்டலமாக காவிரி டெல்டா முழுவதையும் அறிவித்து அதற்கு மத்திய அரசின் முழுஅங்கீகாரத்தையும் பெற்றிட வேண்டுமென, தமிழக அரசை திமுக விவசாய அணியின் இக்கூட்டம் வலியுறுத்துகிறது.

தீர்மானம் -2 :

கிருஷ்ணகிரி கே.ஆர்.பி. அணையின் அனைத்து மதகுகளும் பழுதடைந்ததால், கடந்த காலங்களில் நீர் நிரம்பியும் அணையின் முழு கொள்ளவான 52 அடியை முழுமையாகப் பயன்படுத்த இயலாமல் விவசாயிகள் பெரிதும் பாதிக்கப்பட்டனர். இந்நிலையில் தற்போது 22 அடி முழுவதும் மண் மண்டிக் கிடப்பதை தூர்வாராமல் கதவுகள் பழுது பார்க்கும் பணி மட்டுமே நடைபெற்று வருகிறது. இந்த அணை முழுவதுமாக விவசாயிகளுக்கு பயன்படும் வகையில் தூர்வாருவதுடன் - அணையின் பராமரிப்பு பணிகளைச் செப்பனிட வேண்டுமென தமிழக அரசை திமுக விவசாய அணி கேட்டுக் கொள்கிறது.

தீர்மானம் -3 :

மத்திய அரசு சமீபத்தில் பயிர்க் காப்பீட்டுத் திட்டத்தில் மாற்றம் செய்து விருப்பப்பட்ட விவசாயிகள் மட்டும் சேர்ந்து கொள்ளலாம் என்ற அறிவிப்பும் - காப்பீட்டு தொகையின் அளவைக் குறைத்திருப்பதும், பயிர் காப்பீட்டு திட்டத்தையே பாழ்படுத்தும் வகையில் அமைந்துள்ளதை திமுக விவசாய அணி வன்மையாக கண்டிக்கிறது.

தீர்மானம் -4 :

தற்போது தமிழகத்தில் நிலத்தடி நீர் உயர்ந்திருப்பதாகவும், தமிழகம் மின்மிகை மாநிலமாக திகழ்வதாகவும், உபரி மின்சாரம் உள்ளதாகவும், தமிழக அரசு தன் சாதனை பட்டியலில் குறிப்பிட்டுள்ளது உண்மையென்றால், தமிழகத்தில் காத்திருப்போர் பட்டியலில் உள்ள அனைத்து விவசாயிகளுக்கும் உடனடியாக மின் இணைப்பை வழங்கிட வேண்டுமென தமிழக அரசை திமுக விவசாய அணி வற்புறுத்துகிறது.

தீர்மானம் -5 :

தமிழக கரும்பு விவசாயிகளுக்கு வழங்க வேண்டிய நிலுவைத் தொகை முழுவதையும் வழங்க வேண்டுமென பலமுறை விவசாய சங்கங்கள் வற்புறுத்தியும், தமிழக அரசு எதையும் பொருட்படுத்தாமல் விவசாயிகள் - அரசு பிரதிநிதிகள் - ஆலை அதிபர்கள் ஆகியோர் அடங்கிய முத்தரப்பு பேச்சு வார்த்தை கூட்டத்தை நடத்தாமல் தவிர்ப்பதையும் திமுக விவசாய அணி கண்டிப்பதுடன், இன்னும் இரண்டுமாத கால இடைவெளிக்குள் தனியார் ஆலைகள் உள்ளிட்ட அனைத்து ஆலைகளும் 2017-18, 2018-19 மற்றும் 2019-20க்கான கரும்பு முழு நிலுவை தொகையையும் வழங்கிட மாநில அரசு தவறினால் திமுக விவசாய அணி நிலுவை தொகை வழங்கப்படாத அனைத்து ஆலைகள் முன்பும், விவசாயிகளை திரட்டி மாபெரும் போராட்டத்தை திமுக விவசாய அணி நடத்தும்.

தீர்மானம் -6 :

தமிழகத்தில் குடிமராமத்து திட்டத்தின் கீழ் மேற்கொள்ளப்படும் ஏரி மராமரத்துப் பணிகள் மிகவும் ஊழல் மையமாக திகழ்கிறது என்பதை தமிழக விவசாயிகள் கவலையுடன் பார்த்து வருகிறார்கள் என்பதை தமிழக அரசு உணர்ந்து முழுமையான மராமரத்து பணிகளை மேற்கொள்ள வேண்டும்.

தீர்மானம் -7 :

திமுகவும் திமுக தலைவரும் எப்போதும் எல்லா வகையிலும் விவசாயிகளின் பாதுகாவலராகவும், உழவர்களை உயர்த்தும் உத்தம பணிகளில் தொடர்ந்து செயல்பட்டு வருவதை தமிழக விவசாயிகள் உணர்ந்துள்ளனர். விவசாயிகளின் நிரந்தப் பாதுகாவலராக திகழும் திமுக தலைவரின் பிறந்த நாளை விவசாயிகளின் பாதுகாப்புத் தினமாக கருதி வருகிற மார்ச் 1-ம் தேதி முதல் 7-ம் தேதி வரை தமிழகத்தின் அனைத்து ஒன்றியங்களிலும் தலைவரின் பிறந்த நாள் சிறப்பு நிகழ்ச்சிகளை திமுக விவசாய அணி நடத்துவதென இக்கூட்டம் தீர்மானிக்கிறது.

மாநில நிர்வாகிகள் பங்கேற்கும் மாவட்டங்களைத் தவிர, மற்ற மாவட்டங்களில் அந்தந்த மாவட்ட விவசாய அணி அமைப்பாளர் தலைமையில், மாவட்ட துணை அமைப்பாளர்கள் முன்னிலையில், அந்தந்த மாவட்டக் கழகச் செயலாளர்கள்/பொறுப்பாளர்களின் அனுமதியோடு, கழகத் தலைவர் ஸ்டாலின் பிறந்த நாள் நிகழ்ச்சிகளை “விவசாயிகளின் பாதுகாப்பு தினம்” என்ற தலைப்பில் எழுச்சியோடும் - சிறப்போடும் நடத்திட வேண்டுமென இக்கூட்டம் தீர்மானிக்கிறது.

இவ்வாறு தீர்மானங்கள் நிறைவேற்றப்பட்டன.

அன்பு வாசகர்களே....


இந்த ஊரடங்கு காலத்தில் வீட்டை விட்டு வெளியே வராமல் நமக்கு நாமே சமூக விலகல் ( Social Distancing) செய்து கொள்வோம். செய்தி ஊடகங்களின் வழியே உலகுடன் தொடர்பில் இருப்போம். பொதுவெளியில் இருந்து தனிமைப்படுத்திக் கொண்டு கரோனா பரவலைத் தடுப்பதில் நம் பங்கை முழுமையாக இந்த சமூகத்துக்கு அளிப்போம்.


CoVid-19 கரோனா தடுப்பு / விழிப்புணர்வு கையேடு - இலவசமாக டவுன்லோடு செய்து பயன்பெறுங்கள்!


- வாசகர்கள் நலனில் அக்கறையுடன் இந்து தமிழ் திசை

தவறவிடாதீர்!

விவசாயிகள் பாதுகாப்பு தினம் ஸ்டாலின் பிறந்த நாள் திமுக 7 தீர்மானங்கள் தீர்மானங்கள் நிறைவேற்றம் திமுக விவசாய அணி கலந்துரையாடல் கூட்டம் ஸ்டாலின் விவசாயிகளின் பாதுகாவலன் திமுக தலைவர் போராட்டம் பாதுகாக்கப்பட்ட வேளாண் மண்டலம்

Sign up to receive our newsletter in your inbox every day!

You May Like

More From This Category

More From this Author