மாறுபட்ட கருத்து கூறுபவர்கள் தேச விரோதிகளோ, பயங்கரவாதிகளோ அல்ல: வீரமணி

மத்திய அரசு இயந்திரங்களின் ஊழல்களையும், கோளாறுகளையும், மெத்தனத்தையும் ஒருதலைபட்சமான சார்பு நிலையையும் சுட்டிக்காட்டி, பரிகாரம் தேட இந்தச் சட்டம் சரியான வாய்ப்பாக, ஏழை, எளிய, நடுத்தர மக்களுக்குக் குறைந்த செலவில் நீதி கிடைக்க வழிவகை செய்து வந்தது.
யாருக்கும் அஞ்சாமல் தகவல் ஆணையம் சுதந்திரத்தோடு செயல்பட்டு வந்தது. அதனை இந்த சட்டத் திருத்தங்கள் செயலற்றதாக ஆக்குவது போல  இரண்டு முக்கிய திருத்தங்களைக் கொண்டு வந்துள்ளது.

1. மத்தியில் முதன்மைத் தகவல் ஆணையர், மாநிலங்களில் தகவல் ஆணையர்களின் பணிக்காலம், ஊதியம் இரண்டையும் நிர்ணயிக்கும் உரிமையை மத்திய அரசுக்கு வழங்குகிறது.
மத்திய அரசின் தயவில், கண் அசைவுக்கும், நல்லெண்ணத்தினையும், அதனை நம்பியே வாழும் நிலை வந்தால், இவர்கள் துணிச்சலுடன், ஓர்ந்து கண்ணோடாது தேர்ந்து செயல்பட முடியுமா? 

மாநிலங்களே கூடாது!

மாநிலங்களே - கூட்டாட்சியே கூடாது என்ற கொள்கை ஆர்எஸ்எஸ் கொள்கை; ஒற்றை ஆட்சி தான் இருக்கவேண்டும் என்ற கூட்டாட்சித் தத்துவத்தினை வற்புறுத்தும் இந்திய அரசியலமைப்புச் சட்டத்தின்மீது பிரமாணம் எடுத்துக்கொண்டே, அதனை மீறுவது, டாஸ்மாக் கடைகளில் "குடி குடியைக் கெடுக்கும் - மது உடல்நலத்துக்குக் கேடு" என்ற முகப்பு எழுத்து - எச்சரிக்கையைப் பொருட்படுத்தாது, மது வாங்குவதுபோல ஒரு ஆபத்தான - நாட்டு நல, மாநில உரிமை, மனித உரிமைப் பறிப்பு ஆகும்.

இப்படி நாளும் சோதனை மேல் சோதனை! ஒரே தேர்தல், ஒரே மதம், ஒரே கலாச்சாரம், ஒரே ரேஷன் கார்டு, ஒரே கல்வித் தலைமை நிர்வாக அமைப்பு. எல்லாம் ஒற்றை நபர், ஒற்றைத் தலைமையா? என்ற கேள்விதான் இந்திய மக்கள் தலை மீது தொங்கும் கொடுவாளாக இருக்கிறது.

பெரியார் பூமியே வழிகாட்டவேண்டும்!
நாடு எங்கே போகிறது? தென்னாட்டு விழிப்பு குறிப்பாக தமிழ்நாட்டின் உரிமைக் குரல் இந்தியா முழுவதும் ஓங்கி ஒலித்து, மக்களை விழிப்படையச் செய்யும் பணி அன்றாடப் பெரும் பணியாகியுள்ள கட்டாயம் தமிழ் நிலத்தின்மீது - பெரியார் பூமியை வழிகாட்ட வைக்கத் தூண்டிக் கொண்டே இருக்கிறது.

இதைவிடப் பெரிய கொடுமை நாளும் திட்டமிட்டு நாடாளுமன்றத்தில் விவாதம் அதிகமின்றியே நிறைவேற்றப்பட்ட பயங்கரவாத தடுப்புச் சட்டத்தில் திருத்தம், பயங்கரவாதத்தை வன்மையாகக் கண்டிப்பதில்  யாருக்கும் சளைத்தவர்கள் அல்ல தமிழக மக்கள்.

ஆனால், இச்சட்டம் நிறுவனங்களைக் குறி வைத்ததைத் தாண்டி, தனி நபர்களையும் குறி வைத்துக் கைது செய்ய வாய்ப்புள்ளது.

தடா, பொடா போன்றவற்றை விடவும் கொடூரமாக இருப்பது மிகவும் வேதனையானது, கண்டிக்கத்தக்கது. இதைத் திரும்பப் பெற்று ஜனநாயகம் காப்பாற்றப்பட வேண்டும். மாறுபட்ட கருத்துக் கூறுபவர்கள் தேச விரோதிகளோ, பயங்கரவாதிகளோ அல்ல",  என கி.வீரமணி தெரிவித்துள்ளார்.