மீட்கப்பட்ட வெள்ளி ஆபரணங்களை பார்வையிட்ட சேலம் மாநகர காவல் ஆணையர் பாபு. படம் : எஸ்.குரு பிரசாத்
சேலம்: வெள்ளிப் பட்டறையில் 550 கிலோ வெள்ளி ஆபரணங்கள் கொள்ளையடிக்கப்பட்ட வழக்கில் 5 பேரை கைது செய்தபோலீஸார், அவர்களிடம் இருந்து 323 கிலோ வெள்ளி ஆபரணங்களை மீட்டுள்ளனர். மீதமுள்ள வெள்ளி ஆபரணங்களையும், கொள்ளையில் தொடர்புடைய மேலும் சிலரையும் தேடி வருகின்றனர்.
சேலம் பள்ளப்பட்டி சின்னேரி வயக்காடு பகுதியில் வெள்ளிப் பட்டறை நடத்தி வருபவர் கார்த்திகேயன். இவரது பட்டறைக்குள் கடந்த 11-ம் தேதி நள்ளிரவில் முகமூடி அணிந்த மர்ம நபர்கள் புகுந்தனர். அங்கிருந்த கண்காணிப்புக் கேமராக்களை சேதப்படுத்திவிட்டு, சுமார் 550 கிலோ வெள்ளிப் பொருட்களை கொள்ளையடித்துச் சென்றனர்.
இதையடுத்து, கொள்ளையர்களைப் பிடிக்க மாநகர காவல் ஆணையர் பாபு உத்தரவின்பேரில், துணை ஆணையர் பாஸ்கரன் மேற்பார்வையில் 3 உதவி ஆணையர்கள் தலைமையில் தனிப்படைகள் அமைக்கப்பட்டன. இந்த தனிப்படையினர் தீவிர விசாரணை நடத்தி, கொள்ளையில் தொடர்புடைய 5 பேரை கைது செய்துள்ளனர்.
இதுகுறித்து காவல் ஆணையர் பாபு செய்தியாளர்களிடம் நேற்று கூறியதாவது: இரண்டு கார்களைப் பயன்படுத்திய கொள்ளையர்கள், சேலத்தில் இருந்து தஞ்சாவூர் சென்று, அங்கிருந்து திண்டுக்கல், கோவை என 24 மணி நேரத்தில் 2,100 கி.மீ. தூரம் பயணம் செய்துள்ளனர். சுங்கச்சாவடிகளை தவிர்த்தும், கண்காணிப்புக் கேமராக்கள் இல்லாத சாலைகளை தேர்ந்தெடுத்தும் சென்றுள்ளனர்.
தனிப்படையில் தொழில்நுட்பத் திறன் கொண்ட போலீஸாரை ஈடுபடுத்தி, சேலம் - மதுரை, சேலம் - கோவை உள்ளிட்ட வழித்தடங்களில் இருந்த சுமார் 1,000 கண்காணிப்புக் கேமராக்களின் பதிவுகளை ஆய்வு செய்தோம். மேலும், சாலைகளில் சென்ற வாகனங்களையும் சரிபார்த்து விசாரித்தோம்.
இதில், தஞ்சாவூரில் பதுங்கியிருந்த கோவையைச் சேர்ந்த அபிஷேக் (21) என்பவரைப் பிடித்து விசாரித்தோம். அவரிடமிருந்து 323 கிலோ வெள்ளி ஆபரணங்கள் பறிமுதல் செய்யப்பட்டன. அபிஷேக் மீது கொலை, கொள்ளை வழக்குகள் உள்ளன. இந்த கொள்ளைச் சம்பவத்தில் தொடர்புடைய ஸ்ரீதர், அருண்குமார், ஞானப்பிரகாசம், அண்ணாமலை ஆகிய மேலும் 4 பேரும் கைது செய்யப்பட்டுள்ளனர். கொள்ளை போனவற்றில் மீதமுள்ள வெள்ளி ஆபரணங்களையும், கொள்ளையில் தொடர்புடைய மேலும் சிலரையும் தேடி வருகிறோம். இவ்வாறு அவர் கூறினார்.
