அரசு பள்ளி ஆய்வக உதவியாளர் பணிக்கு விண்ணப்பித்தவர்களுக்கு ஆன்-லைனில் தேர்வுக்கூட அனுமதிச்சீட்டு பதிவேற்றம் செய்யப்பட்டுள்ளது. இதை தேர்வுத் துறையின் இணையதளத்தில் இருந்து பதிவிறக்கம் செய்துகொள்ளலாம்.
இது தொடர்பாக அரசு தேர்வுத்துறை இயக்குநர் கே.தேவராஜன் இன்று வெளியிட்ட செய்திக்குறிப்பில் கூறியிருப்பதாவது:
அரசு பள்ளி ஆய்வக உதவியாளர் (லேப் அசிஸ்டென்ட்) பணிக்கான தேர்வு மே 31-ம் தேதி நடைபெற உள்ளது. தேர்வுக்கு விண்ணப்பித்தவர்கள் தேர்வுக்கூட அனுமதிச்சீட்டை தேர்வுத்துறையின் இணையதளத்திலிருந்து (www.tndge.in) பதிவிறக்கம் செய்துகொள்ளலாம்.
இந்த இணையதளத்தில் சென்று “Lab Assistant Screen Test Exam Hall Ticket Download” என்ற பகுதியை கிளிக் செய்ய வேண்டும். அப்போது தோன்றும் திரையில் தேர்வர்கள் விண்ணப்பத்தில் உள்ள பதிவு எண் மற்றும் பிறந்த தேதி விவரங்களை குறிப்பிட்டு டவுன்லோடு என்பதை கிளிக் செய்தால் தேர்வுக்கூட நுழைவுச்சீட்டு பதிவிறக்கம் ஆகும். அதை பிரின்ட் அவுட் எடுத்துக்கொள்ள வேண்டும்.
இவ்வாறு தேவராஜன் கூறியுள்ளார்.
ஆய்வக உதவியாளர் பணியில் 4,362 காலியிடங்களுக்கு 8 லட்சத்து 87 ஆயிரம் பேர் விண்ணப்பித்துள்ளனர் என்பது குறிப்பிடத்தக்கது.