கோவை மாவட்டத்தில் உள்ளாட்சித் தேர்தலையொட்டி 3,651 வாக்குப்பதிவு மையங்கள் அமைக்கப்பட உள்ளன. இது தொடர்பான வரைவுப் பட்டியலை மாவட்ட ஆட்சியர் நேற்று வெளியிட்டார்.
உள்ளாட்சித் தேர்தல் தொடர்பாக ஊரக வளர்ச்சித் துறை மூலமாக மேற்கொள்ளப்படும் பணிகள் குறித்த ஆய்வுக் கூட்டம் மற்றும் அனைத்துக் கட்சிப் பிரதிநிதிகளுடனான ஆலோசனைக் கூட்டம் கோவை மாவட்ட ஆட்சியர் த.ந.ஹரிஹரன் தலைமையில் நேற்று நடைபெற்றது.
வரைவு வாக்குச்சாவடி மையங்களின் பட்டியலை, அனைத்துக் கட்சிப் பிரதிநிதிகள் முன்னிலையில் வெளியிட்டு ஆட்சியர் பேசியதாவது:
உள்ளாட்சித் தேர்தலின்போது பொதுமக்கள் எளிதில் வாக்க ளிக்கும் வகையில் வாக்குச்சாவடி மையங்கள் அமைக்கப்படும். கோவை மாநகராட்சியில் 100 வார்டுகளுக்கு 1,197 வாக்குச்சாவடி மையங்கள், பொள்ளாச்சி, மேட்டுப்பாளையம், வால்பாறை ஆகிய 3 நகராட்சிகளில் உள்ள 90 வார்டுகளுக்கு 227 வாக்குச்சாவடி மையங்கள், 37 பேரூராட்சிகளில் உள்ள 585 வார்டுகளுக்கு 742 மையங்கள், 228 கிராம ஊராட்சிகளில் 2,034 வார்டுகளுக்கு 1,485 மையங்கள் என மாவட்டத்தில் மொத்தம் 2,809 வார்டுகளுக்கு 3,651 வாக்குப்பதிவு மையங்கள் அமைக்கப்பட உள்ளன. வாக்குப்பதிவு மையங்கள் மாற்றம் தொடர்பாக அங்கீகரிக்கப்பட்ட கட்சிப் பிரதிநிதிகள், தகவல் மற்றும் விளக்கம் தெரிவிக்க விரும்பினால், வரும் 20-ம் தேதிக்குள் தங்கள் பகுதிக்கு உட்பட்ட தேர்தல் நடத்தும் அலுவலரிடம் இதுகுறித்து தெரிவிக்கலாம்.
மேலும், வாக்காளர் பட்டியல் விவரம் குறித்து தங்கள் பகுதியில் உள்ள தேர்தல் நடத்தும் அலுவலரி டம் தெரிந்துகொள்ளலாம் என்றார்.
இந்த நிகழ்ச்சியில், மாவட்ட வருவாய் அலுவலர் துரை ரவிச்சந்திரன், மாவட்ட ஊரக வளர்ச்சி முகமை திட்ட இயக்குநர் ரூபன்சங்கர்ராஜா, கோட்டாட்சியர் மதுராந்தகி, மாவட்ட ஆட்சியரின் நேர்முக உதவியாளர் (தேர்தல்) பி.ஹெச்.முருகன் மற்றும் அனைத்துக் கட்சிப் பிரதிநிதிகள் பங்கேற்றனர்.