ஆர்.கே.நகர் தொகுதிக்கான தேர்தல் நடத்தும் அலுவலராக ஆதிதிராவிடர், பழங்குடியினர் நலத் துறை இணை இயக்குநர் தி.நா.பத்மஜா தேவி நியமிக்கப்பட்டுள்ளார்.
முன்னாள் முதல்வர் ஜெயலலிதா கடந்த டிசம்பர் 5-ம் தேதி காலமானார். அவரது மறைவைத் தொடர்ந்து, அவர் போட்டியிட்டு வென்ற சென்னை ஆர்.கே.நகர் தொகுதி காலியானதாக அறிவிக்கப்பட்டது. அத்தொகுதிக்கு ஏப்ரல் 12-ம் தேதி இடைத்தேர்தல் நடத்தப்படும் என தேர்தல் ஆணையம் நேற்று முன்தினம் அறிவித்தது. இதற்கான வேட்புமனு தாக்கல் 16-ம் தேதி தொடங்குகிறது.
இந்நிலையில், ஆர்.கே.நகர் தொகுதிக்கு தேர்தல் நடத்தும் அலுவலர் நியமிக்கப்பட்டுள்ளார். இது தொடர்பாக மாவட்ட தேர்தல் அதிகாரியான சென்னை மாநகராட்சி ஆணையர் தா.கார்த்திகேயன் நேற்று அறிவித்துள்ளதாவது:
தேர்தல் அறிவிக்கப்பட்டதை தொடர்ந்து, ஆர்.கே.நகர் தொகுதி அடங்கிய சென்னை மாவட்டம் முழுவதும் நடத்தை விதிகள் அமலுக்கு வந்துள்ளன. ஆர்.கே. நகர் சட்டப்பேரவை தொகுதி இடைத்தேர்தலுக்கு ஆதிதிராவிடர், பழங்குடியினர் நலத்துறை இணை இயக்குநர் தி.நா.பத்மஜா தேவி தேர்தல் நடத்தும் அலுவலராக நியமிக்கப்படுகிறார்.
தண்டையார்பேட்டை வட்டாட்சி யர் என்.சி.சேகர், தண்டையார் பேட்டை சமூக பாதுகாப்பு திட்ட தனி வட்டாட்சியர் சு.மதன் பிரபு ஆகியோர் தேர்தல் நடத்தும் உதவி அலுவலர்களாக நியமிக்கப் பட்டுள்ளனர். வாக்காளர் பதிவு அலுவலராக தண்டையார்பேட்டை மண்டல அலுவலர் கே.பி.விஜயகுமார் நியமிக்கப்பட்டு உள்ளார்.
தேர்தல் நடத்தும் அலுவலர் அலுவலகம், தண்டையார்பேட்டை மாநகராட்சி மண்டல அலுவலகத்தில் செயல்படும். அரசியல் கட்சிகள், பொதுமக்கள் அனைவரும் நடத்தை விதிகளுக்கு உட்பட்டு, தேர்தலை சுதந்திரமாகவும், நியாயமாகவும் நடத்த ஒத்துழைப்பு அளிக்க வேண்டும்.
இவ்வாறு அதில் கூறப்பட்டுள்ளது.
தற்போது ஆர்.கே.நகர் தொகுதி தேர்தல் நடத்தும் அலுவலராக நியமிக்கப்பட்டுள்ள பத்மஜா தேவி, கடந்த 2016-ம் ஆண்டு பொதுத்தேர்தலின்போதும், ஆர்.கே. நகர் தொகுதி தேர்தல் நடத்தும் அலுவலராக பணியாற்றியவர் என்பது குறிப்பிடத்தக்கது. அப் போது, மறைந்த முதல்வர் ஜெயலலிதா இத்தொகுதியில் போட்டியிட்டார். அவர் தனது வேட்புமனுவை பத்மஜா தேவி யிடம்தான் தாக்கல் செய்தார். அப்போது, ஜெயலலிதாவுக்கு மாற்று வேட்பாளராக மதுசூதனன் போட்டியிட்டார். அவர் தற்போது ஓபிஎஸ் அணியில் உள்ளார்.