Published : 25 Mar 2017 18:00 pm

Updated : 16 Jun 2017 14:03 pm

 

Published : 25 Mar 2017 06:00 PM
Last Updated : 16 Jun 2017 02:03 PM

அகழாய்வுப் பணிகள் தொடர அமர்நாத் ராமகிருஷ்ணாவின் இடமாறுதல் உத்தரவை ரத்து செய்க: முத்தரசன்

அகழாய்வுப் பணிகள் தொடர்ந்து தொய்வின்றி நடைபெற அமர்நாத் ராமகிருஷ்ணாவின் இடமாறுதல் உத்தரவை ரத்து செய்ய வேண்டும் என்று இந்திய கம்யூனிஸ்ட் கட்சியின் மாநிலச் செயலாளர் முத்தரசன் கூறியுள்ளார்.

இது தொடர்பாக இன்று அவர் வெளியிட்ட அறிக்கையில், ''கீழடி அகழ்வாய்வுப் பணியை முடக்காமல், தொடர்ந்து ஆய்வு மேற்கொள்ள, கண்காணிப்பாளர் கே.அமர்நாத் ராமகிருஷ்ணா மாற்றத்தை மத்திய அரசு ரத்து செய்ய வேண்டும் .

சிவகங்கை மாவட்டம் திருப்புவனம் அருகே உள்ள கீழடி பள்ளிச்சந்தை புதூரில் கடந்த 2015 ஆம் ஆண்டு முதல் அகழ்வாய்வு பணி நடைபெற்று வந்தது. மத்திய தொல்லியல் கண்காணிப்பாளர் கே.அமர்நாத் ராமகிருஷ்ணா தலைமையில் இப்பணி சிறப்புற நடைபெற்று வந்தன.

முதலாமாண்டு 43 குழிகள் தோண்டப்பட்டதில் 1800 தொல்லியல் பொருட்கள் கிடைத்தன. இரண்டாமாண்டு 59 குழிகள் தோண்டப்பட்டதில் சுமார் 3800 தொல்லியல் பொருட்கள் கிடைத்துள்ளன. இவ்வாய்வின் மூலம், தமிழகத்தில் முதல்முறையாக நகர நாகரிகம் இருந்தற்கான ஆதாரமாக நிறைய கட்டிடங்கள் கிடைத்தன. இதன் மூலம் இலக்கியங்களில் இருந்த குறிப்புகள் உறுதிப்படுத்தப்பட்டுள்ளன.

110 ஏக்கர் பரப்பளவு உள்ள தொல்லியல் மேட்டில் ஒரு ஏக்கர் பரப்பளவில் மட்டும் 102 அகழ்வாய்வுக் குழிகளில் சுமார் 5300 தொல்லியல் பொருட்கள் கிடைத்துள்ளன.

மூன்றாம் கட்ட அகழ்வாய்வு பணிகளை தொடங்காமல் இழுத்தடிக்க மத்திய அரசு மேற்கொண்ட முயற்சியை தமிழ்நாட்டில் அனைவரும் கண்டித்த காரணத்தால் வேண்டா வெறுப்பாக, தவிர்க்க முடியாமல் மூன்றாம் கட்ட பணிக்கு அனுமதி அளித்த மத்திய அரசு தற்போது இப்பணிகளை முடக்கும் நோக்கத்துடன் இப்பணியில் மிகுந்த ஆர்வத்துடன் முனைப்பாக செயல்பட்டுவரும் கண்காணிப்பாளர் கே.அமர்நாத் ராமகிருஷ்ணாவை இடம் மாற்றம் செய்துள்ளதை இந்தியக் கம்யூனிஸ்ட் கட்சி கண்டிக்கிறது.

கண்காணிப்பாளர் நிலையில் உள்ள ஆய்வாளரை மாற்றிவிட்டு துணைக் கண்காணிப்பாளர் பொறுப்பில் உள்ள ஒருவரை நியமனம் செய்திருப்பது, திட்டத்தை முடக்கச் செய்திடும் உள்நோக்கம் உடையதாகும்.

ஆய்வுப் பணிகள் தொடர்ந்து தொய்வின்றி நடைபெற அமர்நாத் ராமகிருஷ்ணாவின் இடமாறுதல் உத்தரவை மத்திய அரசு ரத்து செய்ய வேண்டும்'' என்று முத்தரசன் கூறியுள்ளார்.





அன்பு வாசகர்களே....


இந்த ஊரடங்கு காலத்தில் வீட்டை விட்டு வெளியே வராமல் நமக்கு நாமே சமூக விலகல் ( Social Distancing) செய்து கொள்வோம். செய்தி ஊடகங்களின் வழியே உலகுடன் தொடர்பில் இருப்போம். பொதுவெளியில் இருந்து தனிமைப்படுத்திக் கொண்டு கரோனா பரவலைத் தடுப்பதில் நம் பங்கை முழுமையாக இந்த சமூகத்துக்கு அளிப்போம்.


CoVid-19 கரோனா தடுப்பு / விழிப்புணர்வு கையேடு - இலவசமாக டவுன்லோடு செய்து பயன்பெறுங்கள்!


- வாசகர்கள் நலனில் அக்கறையுடன் இந்து தமிழ் திசை

அகழாய்வுப் பணிகள் தொடரஅமர்நாத் ராமகிருஷ்ணாஇடமாறுதல் உத்தரவை ரத்து செய்கமுத்தரசன்

Sign up to receive our newsletter in your inbox every day!

You May Like

More From This Category

More From this Author