அதிமுகவினர் மீதான தேர்தல் நடத்தை விதி மீறல் புகார்கள் மீது உடனடி நடவடிக்கை எடுக்க வேண்டும் என வலியுறுத்தி தமிழக தலைமைத் தேர்தல் அதிகாரியிடம் திமுக சார்பில் வலியுறுத்தப்பட்டுள்ளது. இதுகுறித்து திமுக தலைமை அலுவலக வழக்கறிஞர் ஐ.பரந்தாமன், செவ்வாய்க்கிழமை வெளியிட்டுள்ள அறிக்கை:
அதிமுகவினர் தேர்தல் நடத்தை விதிகளை மீறியதாக திமுக சார்பில் மார்ச் 15 முதல் 28 வரை 6 புகார்கள் அளிக்கப்பட்டுள்ளன. அவற்றின் மீது நடவடிக்கை எடுக்க வலியுறுத்தி தமிழக தலைமைத் தேர்தல் அதிகாரி பிரவீண் குமாரிடம் செவ்வாய்க்கிழமை மனு அளிக்கப்பட்டது.
கடலூரில் அமைச்சர் சம்பத், கோயம்புத்தூரில் மேயர் வேலுச்சாமி சம்பந்தப்பட்ட சம்பவங்கள் உள்பட 6 புகார் களுக்கும் ஆதாரங்கள் இணைத்தே தரப்பட்டுள்ளன. இவற்றின் மீது உடனடியாக நடவடிக்கை எடுக்க வேண்டும் என்று வலியுறுத்தப்பட்டுள்ளது.
இவ்வாறு அறிக்கையில் கூறப்பட்டுள்ளது.