சபாநாயகரின் சர்வாதிகார போக்கைக் கண்டித்து தமிழக சட்டப்பேரவை வளாகத்தில் தர்ணாவில் ஈடுபட்டதாக எதிர்க்கட்சித் தலைவர் மு.க.ஸ்டாலின் விளக்கமளித்துள்ளார்.
தமிழக சட்டப்பேரவைக்கு இன்று (வியாழக்கிழமை) வந்த திமுக உறுப்பினர்களை அவைக்காவலர்கள் தடுத்து நிறுத்தினர். அப்போது திமுகவினர் தாங்கள் எதிர்க்கட்சித் தலைவர் அறைக்குச் செல்லவே வந்திருப்பதாகக் கூறினார்.
ஆனாலும் அவர்களுக்கு அனுமதி அளிக்கப்படவில்லை. இதனையடுத்து எதிர்க்கட்சித் தலைவர் மு.க.ஸ்டாலின், துணைத் தலைவர் துரைமுருகன் உள்ளிட்ட திமுக எம்எல்ஏக்கள் சட்டப்பேரவை வளாகத்தில் வாயில் எண் 4-ன் அருகே அமர்ந்து தர்ணாவில் ஈடுபட்டனர். சுமார் 2 மணி நேரம் இந்த தர்ணா நடைபெற்றது.
ஸ்டாலின் விளக்கம்:
சட்டப்பேரவை எதிர்க்கட்சித் தலைவரான என்னை எனது அறைக்குச் செல்லவிடாமல் தடுத்து நிறுத்துகின்றனர். சட்டப்பேரவைக்குள் செல்லத்தான் அனுமதி இல்லை எனது அறைக்குச் செல்ல அனுமதி உண்டு எனக் கூறியும் விடவில்லை. எனவே, சபாநாயகரின் சரவாதிகாரப் போக்கைக் கண்டித்து அடையாள தர்ணா போராட்டத்தில் ஈடுபட்டோம்.
திமுக ஆக்கபூர்வமாகவே சட்டப்பேரவையில் செயல்பட்டு வருகிறது அவையில் இருந்து வெளிநடப்பு செய்ய வேண்டும், அவையை புறக்கணிக்க வேண்டும் என நாங்கள் நினைத்ததில்லை. எங்கள் எதிர்ப்பைத் தெரிவிக்க ஓரிரண்டு சமயங்களில் மட்டும் வெளிநடப்பு செய்திருக்கிறோம்.
சட்டப்பேரவை நிகழ்ச்சிகளை பல்வேறு மாநில அரசுகளும் நேரலையாக ஒளிபரப்புகின்றன. அதேபோல் தமிழக சட்டப்பேரவை நிகழ்வுகளையும் நேரலையாக ஒளிபரப்ப வேண்டும் என நீண்ட காலமாக வலியுறுத்தி வருகிறோம். ஆனாலும், அது எடுபடவில்லை. வழக்கு நிலுவையில் இருக்கிறது என ஏதாவது காரணம் சொல்கின்றனர்.
தமிழக சட்டப்பேரவை நிகழ்வுகளை நேரலையாக ஒளிபரப்பினால் மட்டுமே உண்மை நிலைமை தெரியவரும்" என்றார்.
துரைமுருகன் சாடல்:
ஸ்டாலினைத் தொடர்ந்து பேசிய எதிர்க்கட்சித் துணைத் தலைவர் துரைமுருகன், "தமிழக சட்டப்பேரவை சபாநாயகருக்கு சட்டம் தெரியவில்லை. எந்தப் பகுதி சபாநாயகர் அதிகாரத்துக்குட்பட்டது என அவருக்குத் தெரியவில்லை. பேரவை மட்டுமே அவர் அதிகாரத்துக்குள் வரும் ஒட்டுமொத்த கோட்டையும் அல்ல.
எதிர்க்கட்சித் தலைவர் அறைக்கு செல்லாவிடாதது சர்வாதிகாரப் போக்கு. சட்டமன்ற உறுப்பினரை கடமையைச் செய்யவிடாமல் தடுத்ததாக உரிமை மீறல் பிரச்சினை கொண்டு வருவேன்" என்றார்.