தமிழகம் முழுவதும் ஆசிரியர் தகுதித் தேர்வு தொடங்கியது

ஆசிரியர் தகுதித் தேர்வு முதல் தாள் தமிழகம் முழுவதும் நடைபெற்று வருகிறது.

மத்திய அரசின் கட்டாயக் கல்வி சட்டத்தின்படி, 1-ம் வகுப்பு முதல் 8-ம் வகுப்பு வரை பாடம் நடத்தும் ஆசிரியர்கள், டெட் எனப்படும் ஆசிரியர் தகுதித் தேர்வில் தேர்ச்சி பெற வேண்டும். இதன்படி, கல்வியியல் முடித்த பட்டதாரிகள், 1 முதல் 5-ம் வகுப்பு வரை பயிற்றுவிக்க டெட் தேர்வின் முதல் தாளிலும், 6 முதல் 8-ம் வகுப்பு வரை பயிற்றுவிக்க இரண்டாம் தாளிலும் தேர்ச்சி பெற வேண்டும்.

இந்நிலையில் டெட் முதல் தாள் தேர்வு இன்றும் (சனிக்கிழமை), இரண்டாம் தாள் தேர்வு நாளையும் நடைபெறுகிறது. முதல் தாள் எழுத ஒரு லட்சத்து 83,000 பேரும், இரண்டாம் தாள் எழுத 4 லட்சத்து 20,815 பேரும் விண்ணப்பித்துள்ளனர்.

தமிழகம் முழுவதும் முதல் தாளுக்கு 471 மையங்களும், இரண்டாம் தாளுக்கு 1,081 மையங்களும் அமைக்கப்பட்டுள்ளன. சென்னையில், முதல் தாளுக்கு 28 மையங்களும், இரண்டாம் தாளுக்கு 60 மையங்களும் அமைக்கப்பட்டுள்ளன.

காலை 10 மணி முதல் மதியம் 1 மணி வரை தேர்வு நடைபெறும். இந்நிலையில், காலையில் ஒரு மணிநேரத்திற்கு முன்னரே 9 மணிக்கு தேர்வர்கள் தேர்வறையில் அனுமதிக்கப்பட்டனர்.

தேர்வறைக்குள் ஹால் டிக்கெட், பேனா தவிர்த்து செல்போன் உள்ளிட்ட மின்னணு பொருட்கள் எதுவும் அனுமதிக்கப்படவில்லை. முறைகேடுகளைத் தடுக்க 2,000 பறக்கும் படைகள் அமைக்கப்பட்டுள்ளன.