Published : 29 Aug 2018 12:49 PM
Last Updated : 29 Aug 2018 12:49 PM
ஆசிய விளையாட்டுப் போட்டிகளில் கலப்பு தொடர் ஓட்டப் போட்டியில் வெள்ளிப் பதக்கம் வென்ற ஆரோக்கிய ராஜிவுக்கு முதல்வர் எடப்பாடி பழனிசாமி 30 லட்ச ரூபாய் ஊக்கத்தொகை அறிவித்துள்ளார்.
இதுதொடர்பாக ஆரோக்கிய ராஜிவுக்கு முதல்வர் எடப்பாடி பழனிசாமி புதன்கிழமை எழுதிய கடிதத்தில், “18-வது ஆசிய விளையாட்டுப் போட்டிகளில் 4*400 மீட்டர் கலப்பு தொடர் ஓட்டப் போட்டியில் வெள்ளிப் பதக்கம் வென்றதை அறிந்து மகிழ்ச்சியடைகிறேன். தமிழக மக்கள் மற்றும் தமிழக அரசு சார்பாக இந்த சாதனைக்கு மனமார்ந்த வாழ்த்துகளை தெரிவித்துக் கொள்கிறேன்.
ஆசிய விளையாட்டுப் போட்டியில் நீங்கள் தொடர்ந்து இரண்டாவது முறையாக பதக்கம் பெற்று தமிழ்நாட்டையும், இந்தியாவையும் உங்களின் திறமையால் பெருமையடையச் செய்ததை மகிழ்ச்சியுடன் நினைவு கூர்கிறேன்.
ஆசிய விளையாட்டுப் போட்டிகளில் வெள்ளிப் பதக்கம் பெறுபவர்களுக்கு ஊக்கத்தொகையாக, கடந்த 2011 ஆம் ஆண்டு மறைந்த முன்னாள் முதல்வர் ஜெயலலிதா ரூ.30 லட்சமாக உயர்த்தி அறிவித்தார். அதன்படி, ரூ.30 லட்சம் ஊக்கத்தொகை பெற நீங்கள் தகுதி பெற்றுள்ளீர்கள்.
உங்களையும், உங்கள் வெற்றிக்கு உறுதுணையாக இருந்த அனைவரையும் வாழ்த்துகிறேன். வருங்காலத்திலும் இத்தகைய சாதனைகள் பல படைத்திட வாழ்த்துகிறேன்” என முதல்வர் எடப்பாடி பழனிசாமி கடிதத்தில் குறிப்பிட்டுள்ளார்.
Sign up to receive our newsletter in your inbox every day!
WRITE A COMMENT