சேலம்: தமிழகம் உள்பட மாநிலங்களில் நேர்மையான முறையில் வாக்காளர் பட்டியல் சரிபார்ப்பு பணியை தேர்தல் ஆணையம் உறுதி செய்ய வேண்டும் என்று முதல்வர் ஸ்டாலின் கூறினார்.
சேலத்தில் நடைபெற்ற இந்திய கம்யூனிஸ்ட் கட்சியின் மாநில மாநாட்டில் பங்கேற்ற முதல்வர் ஸ்டாலின் பேசியதாவது: எல்லோருக்கும் எல்லாம் என்ற லட்சியத்துடன், திராவிட இயக்கங்களோடு கம்யூனிஸ்ட்கள் கொள்கை உறவு கொண்டுள்ளன. இந்த உறவு எப்போதும் நீடிக்க வேண்டும். அப்போதுதான் தலைமுறைகள் காப்பாற்றப்படும்.
1950-ல் சேலம் சிறையில் 22 கைதிகள் சுட்டுக் கொல்லப்பட்டனர். அந்த நாளை கண்டன நாளாக அறிவித்த பெரியார், ஊர்வலங்களை நடத்தினார். கம்யூனிஸ்ட் கட்சியின் கோரிக்கையை ஏற்று அங்கு மணி மண்டபம் அமைக்கப்படும்.திமுக தோழமைக் கட்சிகளின் ஒற்றுமை பலரின் கண்களை உறுத்துகிறது. கூட்டணியை உடைக்க எத்தனையோ சதி செய்து, பொய் தகவல்களை பரப்புகின்றனர். அதில் முக்கியமானவர் எதிர்க்கட்சித் தலைவர் பழனிசாமி. அவருக்கு கம்யூனிஸ்ட் கட்சிகளின் மேல் திடீர் பாசம் பொங்குகிறது. அடிமைத்தனம் பற்றி பழனிசாமி பேசலாமா?
எங்களைப் பொறுத்தவரை யாரும், யாருக்கும் அடிமை இல்லை. எங்களது இயக்கம் அடிமைத் தனத்துக்கு எதிரானது. அந்தக் கொள்கை தெரியாமல் பழனிசாமி கொச்சைப்படுத்தி பேசுகிறார். கூட்டணியில் இருந்தாலும்நியாயமான கோரிக்கைகளை முன்வைக்க கம்யூனிஸ்ட்கள் தவறுவதில்லை. நாங்களும் அந்தக் கோரிக்கைகளை நிறைவேற்றிக் கொண்டுதான் வருகிறோம்.
ஜனநாயகத்துக்கு அடிப்படையான தேர்தல் ஆணையத்தை பாஜக தனது கிளை அமைப்பாக மாற்றிவிட்டது. தேர்தல் ஆணையர்கள் நியமனத்தில்தான் சதி செய்கிறார்கள் என்றால், வாக்காளர் பட்டியலிலும் சதி செய்துள்ளனர். மக்களாட்சியைப் பாதுகாக்க, இந்த சதித் திட்டத்தை அம்பலப்படுத்திய ராகுல் காந்திக்கு எனது பாராட்டுகள். தமிழகம் உள்ளிட்ட மாநிலங்களில் தேர்தல் நடைமுறைகள் தொடங்குவதற்கு முன்பாக, சுதந்திரமான, நேர்மையான முறையில் வாக்காளர் பட்டியல் சரிபார்ப்பு பணியை தேர்தல் ஆணையம் உறுதி செய்ய வேண்டும்.
2021 போல 2026 தேர்தலிலும் எங்களது வெற்றி தொடரும். திராவிட மாடல் 2.0 ஆட்சி உருவாகும். இதற்கு கம்யூனிஸ்ட் தோழர்களும் உடனிருக்க வேண்டும். இவ்வாறு முதல்வர் ஸ்டாலின் பேசினார்.
பாஜகவுக்கு கண்டனம்: பாசிச கொள்கைகளுடன், தொழிலாளர்கள், விவசாயிகள், மாணவர்கள் என அனைத்துத் தரப்பினருக்கும் எதிரான திட்டங்களை செயல்படுத்தி வரும் மத்திய பாஜக அரசுக்கு இந்திய கம்யூனிஸ்ட் கட்சி கடும் கண்டனம் தெரிவிக்கிறது.திமுக கூட்டணியை உடைக்க பாஜக மேற்கொள்ளும் முயற்சிகள் பலிக்காது. திமுக தலைமையிலான மதச் சார்பற்ற முற்போக்குக் கூட்டணி வரும் சட்டப்பேரவைத் தேர்தலில் பெரும் வெற்றி பெற பாடுபடுவது உள்ளிட்ட தீர்மானங்கள் மாநாட்டில் நிறைவேற்றப்பட்டன.