சென்னை: பாஜக நிர்வாகி டாக்டர் அரவிந்த் ரெட்டி கொலை வழக்கில் கைதான அபுபக்கர் சித்திக்கை 5 நாள் காவலில் விசாரிக்க நீதிமன்றம் அனுமதி அளித்துள்ளது. பாஜக மாநில மருத்துவ அணி செயலராக இருந்த டாக்டர் அரவிந்த் ரெட்டி, வேலூர் கொசப்பேட்டையில் 2012-ல் படுகொலை செய்யப்பட்டார்.
இது தொடர்பாக சிபிசிஐடி பிரிவு போலீஸார் விசாரித்து, தீவிரவாதிகள் பிலால் மாலிக், போலீஸ் பக்ருதீன் உள்ளிட்டோரை கைது செய்தனர். மேலும், முக்கிய நபரான அபுபக்கர் சித்திக்கை தனிப்படை போலீஸார் தேடி வந்தனர்.
குண்டுவெடிப்பு உள்ளிட்ட பல்வேறு வழக்குகளில் தொடர்புடைய அபுபக்கர் சித்திக் தொடர்ந்து இருப்பிடத்தை மாற்றிவந்ததால், அவரைக் கைது செய்வதில் தீவிரவாத தடுப்புப் பிரிவு போலீஸாருக்கு பின்னடைவு ஏற்பட்டது.
இந்நிலையில், கடந்த 30 ஆண்டுகளாக தலைமறைவாக இருந்த அபுபக்கர் சித்திக்கை ஆந்திர மாநிலம் அன்னமய மாவட்டம் கடப்பா அருகேயுள்ள ராயச்சோட்டில் தமிழக போலீஸார் அண்மையில் துப்பாக்கி முனையில் கைது செய்தனர். கடந்த 1-ம் தேதி எழும்பூர் நீதிமன்றத்தில் ஆஜர்படுத்தப்படுத்தப்பட்ட அபுபக்கர் சித்திக், பின்னர் புழல் சிறையில் அடைக்கப்பட்டார்.
சென்னை எழும்பூரில் செயல்பட்ட பழைய காவல் ஆணைய அலுவலக வளாக சுவரில் வெடிகுண்டு வைத்தது உள்ளிட்ட 7 வழக்குகள் தொடர்பாக ஏற்கனவே 6 நாட்கள் தீவிரவாத தடுப்புப் பிரிவு போலீஸாரால் அபுபக்கர் சிக்திக் விசாரிக்கப்பட்டார்.
இந்நிலையில், டாக்டர் அரவிந்த் ரெட்டி கொலை வழக்கில் அபுபக்கர் சித்திக்கை 7 நாட்கள் காவலில் வைத்து விசாரிக்க அனுமதி கோரி, பூந்தமல்லியில் உள்ள தேசிய புலனாய்வு சிறப்பு நீதிமன்றத்தில் போலீஸார் மனு அளித்தனர்.
இந்த மனுவை விசாரித்த நீதிபதி மலர்விழி, அபுபக்கர் சித்திக்கை 5 நாட்கள் போலீஸ் காவலில் வைத்து விசாரிக்க அனுமதி அளித்தார். மேலும், விசாரணை முடிந்து வரும் 28-ம் தேதி மீண்டும் நீதிமன்றத்தில் ஆஜர்படுத்துமாறும் உத்தரவிட்டார். இதையடுத்து தீவிரவாத தடுப்புப் பிரிவு போலீஸார் அபுபக்கர் சித்திக்கை ரகசிய இடத்துக்கு அழைத்துச் சென்று, விசாரணை மேற்கொண்டுள்ளனர்.