வேலுமணிக்கு கடிவாளம் போட வேலுசாமிக்கு பதவியா? - கோவை அதிமுகவை சுழற்றியடிக்கும் சர்ச்சை

அதிமுக முன்னாள் அமைச்சர் செ.ம.வேலுசாமி திமுக-வில் இணையப் போகிறார் என்று வதந்திகள் வட்டமடித்த நிலையில், அவரை கட்சியின் அமைப்புச் செயலாளராக்கி இருக்கிறார் பழனிசாமி. இவரோடு சேர்ந்து, முன்னாள் எம்எல்ஏ - வான ஆர்.சின்னசாமியும் அமைப்புச் செயலாள ராக்கப்பட்டிருக்கிறார். இப்படி ஒரே மாவட்டத்தில் இருவருக்கு திடீரென அமைப்புச் செயலாளர் பதவி வழங்கப்பட்டது பல்வேறு யூகங்களைக் கிளப்பி விட்டிருக்கிறது.

அ​திமுக கோட்டை எனச் சொல்​லப்​படும் கோவை மாவட்​டத்​தில் தவிர்க்க முடியாத சக்தியாக இருப்​பவர் முன்​னாள் அமைச்சர் எஸ்.பி.வேலுமணி. தலைமை நிலையச் செயலா​ள​ராகப் பொறுப்பு வகித்து வரும் இவர், டெல்லி வரைக்​கும் தனது நட்பு வளையத்தை விரித்து வைத்​திருக்​கிறார். பாஜக-வுடன் கூட்​ட​ணி​யைத் தொடர வேண்​டும் என்ற மனநிலை​யில் இருக்​கும் வேலுமணி, பிரிந்​தவர்கள் மீண்​டும் ஒன்றிணைய வேண்​டும் என்ப​தி​லும் கூடுதல் ஆர்வத்​துடன் இருப்​பவர்.

இது தொடர்பாக முன்​னாள் அமைச்​சர்கள் 5 பேரை திரட்​டிக் கொண்டு சேலத்​துக்கே சென்று பழனி​சாமியை சந்தித்து வலியுறுத்​தி​ய​வர். இதையெல்​லாம் பழனி​சாமி அவ்வள​வாய் ரசிக்க​வில்லை என்றாலும் வேலுமணியை அவரால் தவிர்க்க முடிய​வில்லை. இப்படியான சூழலில் தான் கோவை ‘சாமிகளை’ அமைப்புச் செயலா​ளர்​களாக அமரவைத்தது பல்வேறு சந்தேகங்களை கிளப்பி இருக்கிறது.

இதுகுறித்து நம்மிடம் பேசிய கோவை மாவட்ட அதிமுக நிர்​வாகிகள் சிலர், “அதி​முக-​வில் 60-க்​கும் மேற்​பட்​டோர் அமைப்புச் செயலா​ளர்​களாக இருக்​கிறார்​கள். தேர்தல் நெருங்​கு​வ​தால் முன்​னாள் அமைச்​சர்​கள், மூத்த எம்எல்​ஏ-க்களை உற்சாகமாக வைத்​துக் கொள்​வதற்காக அவர்களுக்கு கட்சி​யில் கூடுதல் பொறுப்புகளை வழங்கி வருகிறார் பழனி​சாமி. அந்த வகையில் தான் செ.ம.வேலு​சாமிக்​கும் ஆர்.சின்ன​சாமிக்​கும் அமைப்புச்​செய​லாளர் பொறுப்பு வழங்​கப்​பட்​டுள்​ளது.

பாஜக தலைவர்​களுடன் நெருக்கம் பாராட்டும் எஸ்.பி.வேலுமணி அதிமுக ஒன்றிணைய வேண்​டும் என்று பிரயாசைப்​படு​வதும் உண்மை​தான். அதனால் அவருக்கு கடிவாளம் போட்டு​வைக்க வேண்​டும் என்ப​தற்​காக​வும் அவரது மாவட்​டத்​தில் புதிதாக இரண்டு பேரை அமைப்புச் செயலா​ள​ராக்கி இருக்​கிறார் பழனி​சாமி என்ற கருத்து​களும் விவா​திக்​கப்​படு​கிறது. ஆனால், இது உண்மையா என்பதை பழனி​சாமியைக் கேட்​டால் தான் தெரி​யும்” என்றனர்.

கோடநாடு கொலை வழக்​கில் விசா​ரிக்​கப்​பட்ட அதிமுக முன்​னாள் எம்எல்​ஏ-வான வி.சி.ஆறுக்​குட்டி திமுக-​வில் இணைந்​தார். தேர்தல் நெருங்​கும் சமயத்​தில் மேலும் அப்படி யாரும் திமுக-வுக்​குப் போய்​விடக் கூடாது என்ப​தற்​காக​வும் பழனி​சாமி இப்படி அணை போட்​டிருக்​கலாம் என்ற பேச்​சும் கோவை அதிமுக-​வில் தடதடக்​கிறது.

இதுகுறித்து செ.ம.வேலுசாமியிடமே கேட்டோம். “அதிமுக-வில் முன்னாள் அமைச்சர்கள், மூத்த எம்எல்ஏ-க்கள் 4 பேருக்கு அண்மையில் அமைப்புச் செயலாளர்கள் பொறுப்பு வழங்கப்பட்டுள்ளது. அதில், கோவை மாவட்டத்தைச் சேர்ந்த இருவருக்கு அமைப்புச் செயலாளர் பொறுப்பு வழங்கப்பட்டது கட்சியின் முடிவு. இதில் வேறெந்த வியூகமும் இல்லை” என்றார் அவர். இப்​படியான சூழலில், முன்னாள் அமைச்சர் செங்கோட்​டையன் வேறு அதிருப்திக் கொடி தூக்கி இருப்பது கொங்கு அதிமுக-வுக்குள் சலசலப்பை உண்டாக்கி இருக்​கிறது!