ஈரோடு கிழக்கு தொகுதியில் பிரச்சாரம் ஓய்ந்தது: நாளை வாக்குப்பதிவுக்கான ஏற்பாடுகள் தீவிரம்

ஈரோடு: ஈரோடு கிழக்கு தொகுதி இடைத்​தேர்​தலுக்கான பிரச்​சாரம் நேற்று மாலை​யுடன் நிறைவடைந்​தது. இதையடுத்து, நாளை (பிப்.5) நடைபெறும் வாக்​குப்​ப​திவுக்கான ஏற்பாடுகள் தீவிரமடைந்​துள்ளன.

ஈரோடு கிழக்கு தொகுதி எம்எல்ஏவாக இருந்த ஈவிகேஎஸ் இளங்​கோவன் மறைவையடுத்து, அத்தொகு​திக்கான இடைத்​தேர்தல் நாளை (பிப்.5) நடைபெறவுள்ளது. இந்தத் தேர்தலை அதிமுக, பாஜக, தேமுதிக உள்ளிட்ட முக்கிய கட்சிகள் புறக்​கணித்​துள்ள நிலை​யில், திமுக, நாம் தமிழர் கட்சி உள்ளிட்ட 46 வேட்​பாளர்கள் போட்​டி​யிடு​கின்​றனர்.

இந்நிலை​யில், தேர்தல் பிரச்​சாரம் நேற்று மாலை 6 மணியுடன் நிறைவடைந்​தது. அதைத்​தொடர்ந்து, தேர்தல் தொடர்பான எந்தவொரு பிரச்​சா​ரமோ, தொலைக்​காட்சி, சினிமா உள்ளிட்ட இதர வழிமுறை​களிலோ தேர்தல் பரப்புரை மேற்​கொள்​ளக்​கூடாது என தேர்தல் ஆணையம் உத்தர​விட்​டுள்​ளது. ஈரோடு கிழக்கு தொகுதி முழு​வதும் 3 நிலை கண்காணிப்பு குழு​வினர், 3 தேர்தல் பறக்​கும் படையினர் தீவிர வாகன சோதனை​யில் ஈடுபட்டு வருகின்​றனர்.

மேலும், 12 இடங்​களில் அமைக்​கப்​பட்​டுள்ள தற்காலிக சோதனை சாவடிகளில், துணை ராணுவத்​தினருடன் உள்ளூர் போலீ​ஸார் இணைந்து வாகன சோதனை​யில் ஈடுபட்டு வருகின்​றனர். ஈரோடு கிழக்கு தொகுதி இடைத்​தேர்தல் வாக்​குப்​ப​திவு நாளை காலை 7 மணிக்கு தொடங்​கு​கிறது. இத்தேர்​தலில் 2 லட்சத்து 27 ஆயிரத்து 546 வாக்​காளர்கள் வாக்​களிக்க வசதி​யாக, 53 இடங்​களில் 237 வாக்​குச்​சாவடி மையங்கள் அமைக்​கப்​பட்​டுள்ளன.

இவற்றுள் 9 வாக்​குச்​சாவடி மையங்கள் பதற்​ற​மானவை என கண்டறியப்​பட்​டுள்​ளது. அங்கு கூடுதல் பாது​காப்பு அளிக்​கப்பட உள்ளது. அனைத்து வாக்​குச்​சாவடிகளி​லும் கண்காணிப்பு கேமரா பொருத்​தப்​பட்​டுள்​ளது. வாக்​குப்​ப​திவு முடிந்​ததும், மின்னணு வாக்​குப்​ப​திவு இயந்​திரங்​கள், வாக்கு எண்ணும் மையமான, சித்தோடு அரசு பொறி​யியல் கல்லூரிக்கு பலத்த பாது​காப்புடன் கொண்டு செல்​லப்​படு​கிறது. வாக்கு எண்ணும் மை​யத்​தில் 5 அடுக்கு பாது​காப்பு ​போடப்​பட்​டுள்​ளது. வாக்கு எண்​ணிக்கை 8-ம் தேதி ​காலை நடைபெறுகிறது.