சைலன்ட் சவுந்தரபாண்டியன்... சமாதானம் செய்தது அருண் நேருவா?

திருச்சி மாவட்டம் லால்குடி தொகுதி திமுக எம்எல்ஏ-வான சவுந்தரபாண்டியன் கடந்த சில மாதங்களுக்கு முன்பு, அமைச்சர் கே.என்.நேருவுக்கு எதிராக முகநூலில் ஆக்ரோஷமாக வெடித்தார். அப்படி சூடாக பேசியவர், தற்போது அடக்கி வாசிக்கிறார். இதன் பின்னணியில், நேருவின் மகனும் பெரம்பலூர் எம்பி-யுமான அருணின் சமாதான சாமர்த்தியம் இருப்பதாகச் சொல்கிறார்கள் திமுக வட்டாரத்தில். லால்குடி தொகுதியை தொடர்ந்து 4-வது முறையாக தன்வச​மாக்கி வைத்திருப்பவர் சவுந்​தர​பாண்​டியன்.

அப்படிப்பட்ட தனக்கு கட்சியில் எவ்வித முக்கிய​வத்து​வமும் தருவதில்லை, தனது தொகுதியில் நடக்கும் அரசு விழாக்​களுக்குக் கூட அமைச்சர் நேருவுக்கு பயந்து​கொண்டு அதிகாரிகள் தன்னை அழைப்​ப​தில்லை என முகநூல் வழியாக புலம்பி வந்தார் சவுந்​தர​ராஜன். இதுகுறித்து திமுக தலைமை​யிடமும் புகார் தெரிவித்​தார். இதையடுத்து இரண்டு தரப்பையும் அழைத்துப் பேசி சமாதானப்​படுத்தி அனுப்​பியது தலைமை. இதன் பிறகு தனது முகநூல் பதிவுகளை மறைத்த சவுந்​தர​பாண்​டியன், நேருவுக்கு எதிராக பேசுவதையும் தவிர்த்​தார்.

லால்குடி தொகுதியில் நடக்கும் அரசு நிகழ்ச்​சிகள் இப்போது சவுந்​தர​பாண்​டியன் தலைமை​யிலேயே நடக்கின்றன. கடந்த 2 மாதங்​களுக்கு முன்பு நடைபெற்ற திமுக செயல்​வீரர்கள் கூட்டத்தில் மேடையில் அமராமல் கீழேயே அமர்ந்​திருந்தார் சவுந்​தர​பாண்​டியன். அவரை மேடைக்கு வரும்படி நேருவின் மகன் அருண் நேரு எம்.பி கையைப்​பிடித்து அழைத்​தார். முதலில் வர மறுத்​தவர், அதன்பிறகு மேடையில் அமர்ந்​திருந்​தார். அதுமுதலே சவுந்​தர​பாண்​டியன் அமைதி​காக்​கிறார். அதற்குக் காரணம், அருண் நேரு என்று சொல்லப்​படு​கிறது.

இதுகுறித்து பேசிய சவுந்​தர​பாண்​டியனின் ஆதரவாளர்கள், “ஒரு காலத்தில் தனது சொந்தத் தொகுதியாக இருந்த லால்குடியில் தனக்கு விசுவாசமான ஒருவரை எம்எல்ஏ பதவியில் அமர்த்த வேண்டும் என நினைத்​துத்தான் சவுந்​தர​பாண்​டியனைக் கொண்டு வந்தார் நேரு. அவரும் நேருவுக்கு விசுவாச​மாகத்தான் இருந்​தார். ஆனால், அதற்கான ‘பலன்’ எதையும் அவர் அடையவில்லை. நேரு தரப்பினர் திமுக எம்எல்​ஏ-க்​களுக்கு எதையுமே கிடைக்க​விடு​வ​தில்லை.

அவர்களுக்குப் போகத்தான் மற்றவர்​களுக்கு. லால்குடியில் சவுந்​தர​பாண்​டியன் 4 முறை ஜெயித்​திருந்தும் பொருளாதார ரீதியாக அவருக்கு எந்த வளர்ச்​சியும் இல்லை. இதைக் கேட்டதால் தான் அவருக்கும் நேருவுக்கும் முட்டிக் கொண்டது. இதையடுத்தே, லால்குடி தொகுதியில் சவுந்​தர​பாண்​டியன் இல்லாமலேயே அமைச்சர் நேரு அரசு திட்டங்களை தொடங்கி வைத்தார். இதில் தலைமை தலையிட்​டதால் தான் நேரு தரப்பு இப்போது சைலன்டாக இருக்​கிறது” என்றனர்.

சவுந்​தர​பாண்​டியனிடம் இதுகுறித்து கேட்ட​போது, “நான் அமைதியாக இருக்​கிறேன் என்பதால் அவர்கள் (நேரு, அருண் நேரு) மாறிவிட்டதாக அர்த்தம் இல்லை. எந்தக்​காலத்​திலும் அவர்களிடம் மாற்றத்தை எதிர்​பார்க்க முடியாது. அவர்களுக்குத் தெரியாமல் கட்சிக்​காரர்கள் 2 ரூபாய்கூட சம்பா​திக்க முடியாது. அதற்காக தினமும் குறைகூறிக் கொண்டிருக்க நாங்கள் இருவரும் திமுக - அதிமுக இல்லை. ஒரு தாய் வயிற்றுப் பிள்ளைகள். கட்சித் தலைமை​யிடம் சொல்ல வேண்டியதை சொல்லி​விட்டு மக்கள் பணிகளை தொடர்​கிறேன்” என்றார்.

இதெல்லாம் ஒரு பக்கமிருக்க, அடுத்த தேர்தலிலும் சவுந்​தர​பாண்​டியன் வெற்றி​பெற்று திமுக ஆட்சி​யமைந்தால் சீனியாரிட்டி அடிப்​படையில் அவருக்கு அமைச்சர் பதவி கிடைக்க வாய்ப்​பிருக்​கிறது. 2 சட்டமன்றத் தொகுதிக்கு ஒரு மாவட்டச் செயலாளர் என கட்சி முடிவெடுத்தால் சவுந்​தர​பாண்​டியனுக்கும் மா.செ வாய்ப்பு தேடி வரலாம். இதையெல்லாம் மனதில் வைத்தே அவர் நேரு தரப்பிடம் பகைமை பாராட்​டாமல் இருக்​கிறார்” என்கிறார்கள். ஆக, வெளிப்​பார்​வைக்கு சமாதான​மாகி​விட்டது போல் தெரிந்​தாலும் உண்மை​யில், நேருவுக்கும் - சவுந்​தர​பாண்​டியனுக்கும் இடையிலான அதிகார யுத்தம் நீறுபூத்த நெருப்​பாகவே இருக்​கிறது!