கரூர்: கரூர் மாவட்டம் குளித்தலை அருகேயுள்ள அய்யர்மலையில் 1,178 அடி உயரத்தில் ரத்தினகிரீஸ்வரர் கோயில் உள்ளது. இங்கு ரூ.9.10 கோடியில் ரோப்கார்வசதி நேற்று முன்தினம் தொடங்கி வைக்கப்பட்டது. இதில் 4 பெட்டிகளில் தலா 2 பேர் பயணம் செய்ய முடியும்.
இந்நிலையில் 2-வது நாளான நேற்று ரோப் கார் இயங்கியபோது காற்று வேகமாக வீசியது. இதனால், கம்பி வடத்தில் இருந்து சக்கரம் நகர்ந்ததால் ரோப்கார் பாதியிலேயே நின்றது. இதையடுத்து, ரோப் காரில் 2 பெட்டிகளில் பயணம் செய்த, திருச்சி மாவட்டம் மணிகண்டம் ஒன்றியம் பள்ளப்பட்டியைச் சேர்ந்த பெரியக்காள்(43), ராசம்மாள்(45), கோசலை(42) ஆகிய 3 பெண்கள் அந்தரத்தில் தவித்தனர். இதையடுத்து, ரோப்கார் பழுதைசரிசெய்யும் பணியில் ஊழியர்கள் ஈடுபட்டனர். ஒன்றரை மணி நேரத்துக்கு பிறகுபழுது நீக்கப்பட்டு, ரோப் காரில் இருந்த 3 பெண்களும் பத்திரமாக மீட்கப்பட்டனர். தற்போது பலத்த காற்று வீசுவதால் ஆடி மாதம் முடியும் வரை ரோப்கார் சேவையை நிறுத்தி வைக்க கோயில் நிர்வாகம் முடிவு செய்துள்ளது.