சமூக வலைதளங்களில் வைரலான வீடியோ: விருது பெற்ற நடத்துநருக்கு மெமோ வழங்கியதால் சர்ச்சை

சென்னை: சென்னை மாநகர போக்குவரத்துக் கழகம் தாம்பரம் பணிமனையில் தாம்பரம் - மண்ணிவாக்கம் செல்லும் மினி பேருந்து நடத்துநராக பணிபுரிபவர் சரவணன். இவர், 2 தினங்களுக்கு முன்பு பணிக்கு சென்றுள்ளார். அப்போது, மினி பேருந்துக்கு பதிலாக, பெரிய பேருந்தில் அவருக்கு பணி ஒதுக்கப்பட்டதாக கூறப்படுகிறது.

இதையடுத்து, அவர் தாம்பரத்தில் இருந்து பயணிகளை ஏற்றிக்கொண்டு கூட்ரோடு வரை சென்றுவிட்டு, மீண்டும் பேருந்தை திருப்பி உள்ளார். அப்போது, அந்த பேருந்தில் பரிசோதனை செய்த டிக்கெட் பரிசோதகர் முனுசாமி, அடுத்த நிறுத்தத்துக்கு ஏன் செல்லவில்லை என கேட்டுள்ளார். அப்போது இருவருக்கும் இடையே வாக்குவாதம் ஏற்பட்டதாக கூறப்படுகிறது.

இதையடுத்து, சரியாக பணி செய்யவில்லை என கூறி நடத்துநர் சரவணனுக்கு, டிக்கெட் பரிசோதகர் மெமோ வழங்கியுள்ளார். இதனால், ஆத்திரம் அடைந்த சரவணன், டிக்கெட் பரிசோதகர்மீது மண்ணை வாரி தூற்றி சாபம் விட்டதாக கூறப்படுகிறது. மேலும், சரவணன் வீடியோ ஒன்றை வெளியிட்டுள்ளார். அந்த வீடியோ தற்போது சமூக வலைதளங்களில் வைரலாகி வருகிறது.

அதில் அவர் கூறியது: ஒருநாள் கூடவிடுப்பு எடுக்காமல் பணிக்கு வந்ததற்காக தாம்பரம் பணிமனையில் எனக்குசிறந்த நடத்துநருக்கான விருது வழங்கப்பட்டது. இன்று எனது திருமணநாள். ஆனாலும், பணிமனை அதிகாரிகள்என்னை தொடர்பு கொண்டு அழைத்ததால் பணிக்கு சென்றேன். எனக்குஒதுக்கப்பட்ட பேருந்தின் வழித்தடம் கடைசி நிறுத்தம் கூட்ரோடுதான். அதனால், அங்கு பயணிகளை இறக்கிவிட்டு பேருந்தை திருப்பினேன்.

டிக்கெட் பரிசோதகர் முனுசாமி, ஏன் அடுத்த நிறுத்தம்வரை செல்லவில்லை என கூறி, தகாத வார்த்தைகளால் திட்டி, எனக்கு மெமோ வழங்கினார். நியாயமாக பணிபுரிந்த எனக்கு கிடைத்த தண்டனை இது. திருமண நாளில் என்னை மனஉளைச்சலுக்கு ஆளாக்கி இருக்கிறார். அவர் மீது நடவடிக்கை எடுக்க வேண்டும். இவ்வாறு அவர் பேசியுள்ளார்.

இதுகுறித்து போக்குவரத்துத் துறை அதிகாரிகளிடம் கேட்டபோது, ‘இருவரிடமும் விசாரணை நடத்தி தவறு யார் மீது இருந்தாலும், அவர்கள் மீது உடனடியாக நடவடிக்கை எடுக்கப்படும்’’ என்றனர். இதனிடையே, சமூக வலைதளங்களில் வீடியோ வெளியிட்டதற்காக நடத்துநர் சரவணன் மீது நடவடிக்கை பாயும் என போக்குவரத்து துறை அதிகாரிகள் தரப்பில் தெரிவிக்கப்படுகிறது.