சென்னை: சென்னை வானிலை ஆய்வு மையத்தின் இயக்குநர் பா.செந்தாமரை கண்ணன் வெளியிட்டசெய்திக்குறிப்பு: மேற்கு திசை காற்றின் வேக மாறுபாடு காரணமாக தமிழகத்தில் ஓரிரு இடங்களில் இன்று (மே 4) முதல் 7-ம் தேதி வரை இடி மின்னல், பலத்த காற்றுடன் லேசானது முதல் மிதமான மழை பெய்யக்கூடும். இதில் குறிப்பிடும்படியாக வரும் 7-ம் தேதி நீலகிரி, கிருஷ்ணகிரி, தர்மபுரி, ஈரோடு, திருப்பத்தூர் மற்றும் வேலூர் மாவட்டங்களில் ஓரிரு இடங்களில் கனமழை பெய்யவும் வாய்ப்புள்ளது.
அதேபோல 7-ம் தேதி வரை அடுத்த 4 நாட்களுக்கு தமிழக உள் மாவட்டங்களில் அதிகபட்ச வெப்பநிலையில் பெரிய மாற்றத்துக்கான வாய்ப்பில்லை. வட தமிழக உள் மாவட்டங்களின் சமவெளி பகுதிகளில் ஒரு சிலஇடங்களில் 111 டிகிரி வரையும், இதர மாவட்டங்களில் 104 டிகிரிவரையும், கடலோர மாவட்டங்களில் 102 டிகிரி ஃபாரன்ஹீட் வரையிலும் வெப்பம் இருக்கக்கூடும்.
முக்கியமாக இன்றும், நாளையும் வட தமிழக உள் மாவட்டங்களில் ஓரிரு இடங்களில் வெப்ப அலை வீசக்கூடும். சென்னை மற்றும் புறநகர் பகுதிகளில் இன்றுவானம் ஓரளவு மேகமூட்டத்துடன் காணப்படும். அதிகபட்ச வெப்பநிலை 104 டிகிரியை ஒட்டியும், குறைந்தபட்ச வெப்பநிலை 84 டிகிரி பாரன்ஹீட் அளவையும் ஒட்டி இருக்கக்கூடும்.
இதுதவிர தெற்கு ஆந்திர கடலோரப்பகுதிகளில் இன்று முதல் 6-ம் தேதி வரை மணிக்கு 65 கிமீ வேகத்தில் சூறாவளிக்காற்று வீசக்கூடும் என்பதால் இந்நாட்களில் மீனவர்கள் இப்பகுதிகளுக்கு செல்ல வேண்டாமென அறிவுறுத்தப்படுகிறது.