தேர்தல் நடத்தை விதிகள் அமலில் உள்ளதால் மே 1-ல் கிராமசபை கூட்டம் இல்லை? - ஊரக வளர்ச்சித் துறை வட்டாரங்கள் தகவல்

சென்னை: தேர்தல் நடத்தை விதிகள் அமலில் உள்ள நிலையில், இந்தாண்டு மே 1-ம் தேதி கிராமசபைக் கூட்டம் நடைபெறாது என தகவல் வெளியாகியுள்ளது.

தமிழகத்தில் கடந்த 2022-ம் ஆண்டு வரை ஜன.26 குடியரசு தினம், மே 1-ம் தேதி தொழிலாளர் தினம், ஆக.15-ம் தேதி சுதந்திர தினம், அக்.1-ம் தேதி காந்தி ஜெயந்தி ஆகிய 4 நாட்கள் 12,525 கிராம பஞ்சாயத்துகளில் கிராமசபை கூட்டம் நடத்தப்பட்டு வந்தது.

இந்நிலையில், கடந்த 2022-ம் ஆண்டு மார்ச் 22 உலக நீர் தினம், நவ.1-ம் தேதி உள்ளாட்சிகள் தினத்திலும் கிராமசபைக் கூட்டம் நடத்தப்படும் என்று தமிழக அரசு உத்தரவிட்டு, அதன்படி ஆண்டுக்கு 6 முறை கிராமசபைக்கூட்டம் நடத்தப்பட்டு வருகிறது.

இக்கூட்டங்களில், சம்பந்தப்பட்ட கிராம ஊராட்சிகளின் எதிர்காலத்திட்டங்கள், நடைபெறும் வளர்ச்சிப்பணிகள், திடக்கழிவு மேலாண்மை உள்ளிட்ட பல்வேறு அம்சங்கள் குறித்து விவாதிக்கப்பட்டு, தீர்மானங்கள் நிறைவேற்றப்படும்.

அந்த வகையில், வரும் மே.1-ம் தேதி மே தினத்தில், கிராமசபைக் கூட்டம் நடத்தப்பட வேண்டும்.

ஆனால், தற்போது தமிழகத்தில் தேர்தல் நடத்தை விதிகள் அமலில் உள்ளது. இதனால், இந்தாண்டு மே 1-ல் கிராமசபைக் கூட்டம் நடத்தப்படுமா என்ற சந்தேகம் எழுந்தது. அதேநேரம், நடத்தை விதிகள் அமலில் இருந்தாலும், வழக்கமான கூட்டங்களை நடத்துவதில் எந்த தடையும் இல்லை என்றே கடந்த ஜனவரி மாதம் வெளியிடப்பட்ட தேர்தல் ஆணையத்தின் வழிகாட்டுதல்களில் கூறப்படுகிறது.

வழக்கமாக, கிராம சபை கூட்டம் நடத்த வேண்டிய நாட்களுக்கு ஒரு வாரம் முன்னதாகவே, அதற்கான அறிவுறுத்தல்கள், வழிகாட்டுதல்கள் சம்பந்தப்பட்ட மாவட்ட நிர்வாகங்கள் மூலம், வருவாய்த் துறையினருக்கு வழங்கப்பட்டுவிடும். ஆனால், இம்முறை இதுவரை அவ்வாறான தகவல்களோ, வழிகாட்டுதல்களோ கிராமங்களுக்கு வழங்கப்படவில்லை.

இந்நிலையில், தேர்தல் நடத்தை விதிகள் அமலில் உள்ளதால் இந்தாண்டு மே 1-ம் தேதி கிராமசபை கூட்டம் நடத்தப்பட வாய்ப்பில்லை என்று ஊரக வளர்ச்சித்துறை வட்டாரங்கள் தெரிவித்தன.