சென்னை: ஈரான் சிறைபிடித்துள்ள சரக்கு கப்பலில் சிக்கியுள்ள தமிழக மாலுமிகள் 4 பேர் உள்ளிட்ட 17 இந்திய மாலுமிகளை மீட்க மத்திய, மாநில அரசுகள் உடனடியாக நடவடிக்கை எடுக்க வேண்டும் என மாலுமிகள் சங்கம் வலியுறுத்தி உள்ளது.
இதுகுறித்து, ஃபார்வர்டு சீமென்ஸ் யூனியன் ஆஃப் இந்தியா (சிஐடியு) துணைத் தலைவர் டி.நரேந்திர ராவ் சென்னையில் நேற்று செய்தியாளர்களிடம் கூறியதாவது: கடந்த மார்ச் 26-ம் தேதி சரக்கு கன்டெய்னர்களை ஏற்றிச் சென்ற எம்.வி.டாலி என்ற கப்பலில் ஏற்பட்ட மின்சார பழுது காரணமாக அதன் சக்தி இழந்து, அமெரிக்காவின் பால்டிமோர் நகரில் உள்ள பட்டாப்ஸ்கோ நதியின் மேல் கட்டப்பட்டிருந்த பிரான்சிஸ் ஸ்காட் பாலத்தின் மீது மோதியது.
இதையடுத்து, அக்கப்பலில் பணியாற்றி வந்த 22 இந்திய மாலுமிகளிடமும் குற்றவியல் விசாரணையை அமெரிக்க அரசின் புலன் விசாரணை குழு நடத்தி வருகிறது. இது மாலுமிகள், அவர்கள் குடும்பத்தினர் மத்தியில் கடும் அதிர்ச்சியையும், கவலையையும் ஏற்படுத்தி உள்ளது.
இது முற்றிலும் மனித சக்தியின் கட்டுப்பாட்டுக்கு அப்பாற்பட்டு நிகழ்ந்த ஒரு விபத்து. எனவே, இதனைஒரு கிரிமினல் குற்றமாகக் கருத முடியாது. இதேபோல், இம்மாதம் 13-ம் தேதி இஸ்ரேலுடன் இணைக்கப்பட்ட எம்எஸ்சி ஆரீஸ் என்ற கப்பலை ஓமன் வளைகுடாவில் உள்ள ஹார்முஸ் ஜலசந்தி அருகே ஈரான் கைப்பற்றியது. இக்கப்பலிலும் 18 மாலுமிகள் சிக்கியுள்ளனர். இதில், 17 பேர்இந்தியர்கள்.
அவர்களில் 4 பேர் தமிழகத்தைச் சேர்ந்தவர்கள். இருவர் தூத்துக்குடியையும், மற்ற இருவர்கடலூர் மற்றும் மன்னார்குடியைச் சேர்ந்தவர்கள். அவர்கள் அனைவரும்ஈரானிய அரசின் ராணுவ கட்டுப்பாட்டில் உள்ளதால், எவ்விதமான தகவல் தொடர்புகளையும் பயன்படுத்த அனுமதிக்கப்படவில்லை.
இந்நிலையில், இக்கப்பலில் சிக்கியகேரளாவைச் சேர்ந்த பெண் மாலுமி ஆன் டெஸ்லா ஜோசப் என்பவரை மத்திய அரசு பத்திரமாக மீட்டது. அதேபோல், தமிழகத்தைச் சேர்ந்த 4 மாலுமிகள் உட்பட இந்திய மாலுமிகள் அனைவரையும் உடனடியாக பத்திரமாக மீட்கமத்திய, மாநில அரசுகள் உடனடியாக நடவடிக்கை எடுக்க வேண்டும் என்று நரேந்திர ராவ் கூறினார்.
இச்சந்திப்பின்போது, சிஐடியுமாநில செயலாளர் சுகுமாறன், சென்னைமாவட்ட செயலாளர் திருவேட்டை உள்ளிட்டோர் உடன் இருந்தனர்.