பொள்ளாச்சியில் 4 இடங்களில் வருமான வரி சோதனை: ரூ.32 கோடி பறிமுதல் செய்யப்பட்டதாக தகவல்

பொள்ளாச்சி: கோவையை அடுத்த பொள்ளாச்சி நகரப் பகுதியில் உள்ள வெங்கடேசா காலனியில் எம்.பி.எஸ் ஹேட்சரீஸ் என்ற கோழிப்பண்ணை நிறுவனம் உள்ளது. இதன் உரிமையாளர்களாக சகோதரர்களான அருள் முருகு, சரவண முருகு ஆகியோர் உள்ளனர். இந்நிறுவனத்தின் நிர்வாக அலுவலகம் அழகப்பா லே-அவுட், வெங்கடேசா காலனி யில் இயங்கி வருகிறது.

மேலும், பொள்ளாச்சியை அடுத்த ஊஞ்சவேலாம்பட்டியில் இந்நிறுவனத்துக்கு சொந்தமான தீவனம் தயாரிக்கும் தொழிற்சாலையும் உள்ளது.

இந்நிலையில், இக்கோழிப் பண்ணை நிறுவனத்துக்குசொந்தமான இடங்களில் பணம்பதுக்கி வைக்கப்பட்டு இருப்பதாக வருமான வரித் துறையினருக்கு தகவல் கிடைத்தது. அதன்படி, 10-க்கும் மேற்பட்ட வருமான வரித்துறை அதிகாரிகள் நேற்றுமுன்தினம் காலை 8 மணிக்கு, பொள்ளாச்சி வெங்கடேசா காலனியில் உள்ள அந்நிறுவனத்தின் நிர்வாக அலுவலகத்துக்கு வந்தனர்.

அங்கு வைக்கப்பட்டிருந்த ஆவணங்களை ஆய்வு செய்தனர். பின்னர் தனித்தனி குழுக்களாக பிரிந்து ஊஞ்சவேலாம்பட்டியில் உள்ள கோழித்தீவன ஆலை, பண்ணைஉள்ளிட்ட 4 இடங்களில் சோதனையில் ஈடுபட்டனர். இதில், மேற்கண்ட இடங்களில் கட்டுக்கட்டாக பணம் வைக்கப்பட்டு இருப்பது தெரிந்தது. இதையடுத்து சோதனை நேற்று முன்தினம் இரவும் தொடர்ந்தது.

இரவு 9 மணியளவில் பொள்ளாச்சி டிஎஸ்பி ஜெயச்சந்திரன் உள்ளே அழைக்கப்பட்டார். பின்னர் சிறிது நேரத்தில் துப்பாக்கிஏந்திய போலீஸார் பாதுகாப்பில் ஈடுபடுத்தப்பட்டனர்.

சோதனை 2-வது நாளாக நேற்றும் தொடர்ந்தது. இதில் கணக்கில் வராத ரூ.32 கோடியைவருமான வரித்துறையினர் கண்டறிந்து பறிமுதல் செய்ததாகத் தெரிகிறது. இந்த பணம் குறித்தும் வருமான வரித் துறையினர் தொடர்ந்து விசாரித்து வருவதாக தகவல்கள் வெளியாகியுள்ளன.