மரத்தின் மீது கார் மோதியதில் 4 இளைஞர்கள் உயிரிழப்பு

நாமக்கல்: நாமக்கல் மாவட்டம் குமாரபாளையம் அருகே மரத்தின் மீது கார் மோதியதில் 4 பேர் உயிரிழந்தனர். குமாரபாளையம் அருகே உள்ள சீராம்பாளையம் பகுதியில் மாரியம்மன் கோயில் திருவிழா நடந்து வருகிறது. இந்த விழாவில் கலந்து கொள்வதற்காக, பள்ளிப்பாளையம் அருகேயுள்ள கிழக்கு தொட்டிபாளையம், சின்னார்பாளையம், சீராம்பாளையம் பகுதிகளைச் சேர்ந்த 5 பேர் நேற்று மாலை காரில் வந்துள்ளனர். காரை தனசேகரன் என்பவர் ஓட்டியுள்ளார்.

குமாரபாளையம் அருகே குப்பாண்டபாளையம் பேருந்து நிறுத்தம் அருகே வந்தபோது, திடீரென ஓட்டுநரின் கட்டுப்பாட்டை இழந்த கார், சாலையோரமுள்ள பனைமரத்தின் மீது மோதியது.

இந்தவிபத்தில், காரில் பயணம் செய்த தனசேகரன்(24), லோகேஷ்(25), சிவக்குமார்(25), கவின்(24) ஆகியோர் பலத்த காயமடைந்து, அந்த இடத்திலேயே உயிரிழந்தனர். ஸ்ரீதர் என்பவர் லேசான காயங்களுடன் மருத்துவமனையில் சேர்க்கப்பட்டுள்ளார். விபத்தில் உயிரிழந்த 4 பேரின் உடல்களையும் போலீஸார் மீட்டு, பிரேதப் பரிசோதனைக்காக குமாரபாளையம் அரசு மருத்துவமனைக்கு அனுப்பிவைத்தனர். மேலும், விபத்து குறித்து வழக்கு பதிவுசெய்து, விசாரித்து வருகின்றனர்.