Published : 24 Feb 2024 08:43 AM
Last Updated : 24 Feb 2024 08:43 AM

தமிழக மீனவர்களுக்கு சிறை தண்டனை: இலங்கைக்கு காங்., பாமக, மதிமுக கண்டனம்

சென்னை: தமிழக மீனவர்களுக்கு சிறை தண்டனை விதித்த இலங்கைக்கு தமிழக காங்கிரஸ் தலைவர் கு.செல்வப்பெருந்தகை, பாமக நிறுவனர் ராமதாஸ், மதிமுக பொதுச் செயலாளர் வைகோ ஆகியோர் கண்டனம் தெரிவித்துள்ளனர்.

கு.செல்வப்பெருந்தகை: இலங்கை கடற்படையினரால் கைது செய்யப்பட்டுள்ள ராமேசுவரம் மீனவர்களுக்கு சிறை தண்டனை விதிக்கப்பட்டுள்ளது கடும் கண்டனத்துக்குரியது. இதை எதிர்த்து மீனவர்கள் வேலைநிறுத்தத்தில் ஈடுபட்டு வருகின்றனர். கடந்த 10 ஆண்டுகால பாஜக ஆட்சியில் தமிழக மீனவர்கள் மீதான இலங்கை கடற்படையினரின் அடக்குமுறை அதிகரித்துள்ளது. இந்த விவகாரத்தில் கச்சத்தீவு அந்தோணியார் திருவிழாவைப் புறக்கணித்து, வரும் 24-ம் தேதி முதல் தொடர் உண்ணாவிரதப் போராட்டம் அறிவித்துள்ள மீனவர்களுக்கு தமிழக காங்கிரஸ் முழு ஆதரவு அளிக்கிறது.

ராமதாஸ்: மீனவர்கள் சிறையில் அடைக்கப்படுவதை தடுக்க முதல்வர் தக்க நடவடிக்கைகளை மேற்கொள்ள வேண்டும். அனைத்துக் கட்சித் தலைவர்களுடன் டெல்லிக்குச் சென்று பிரதமர் மோடியை சந்தித்து, மீனவர் பிரச்சினைக்கு நிரந்தரத் தீர்வு காணுமாறு வலியுறுத்த வேண்டும்.

வைகோ: இலங்கையின் புதிய கடல் தொழில் மீன்பிடி சட்டத்தின்படி தமிழக மீனவர்களைக் கைது செய்வது, கோடிக்கணக்கில் அபராதம் விதிப்பது, படகுகளை அரசுடமையாக்குவது மற்றும் அதிகபட்சமாக 2 ஆண்டுகள் வரை சிறை் தண்டனை விதிப்பது போன்ற நடவடிக்கையில் இலங்கை அரசு ஈடுபடுகிறது. இலங்கை அரசின் புதிய சட்டத்தை அமல்படுத்த விடாமல் தடுக்க வேண்டும் என்று தமிழக மீனவர்கள் 4 ஆண்டுகளுக்கு முன்பே மத்திய அரசை தொடர்ந்து வலியுறுத்தினர். தற்போது வரை மீனவர்களின் கோரிக்கையை மத்திய அரசு புறக்கணிப்பது கடும் கண்டனத்துக்குரியது. இலங்கை சிறையில் அடைக்கப்பட்டிருக்கும் தமிழக மீனவர்களை விடுவிப்பதுடன், பறிமுதல் செய்யப்பட்டுள்ள மீன்பிடி படகுகளையும் மீட்க வேண்டும்.

FOLLOW US

தவறவிடாதீர்!

Sign up to receive our newsletter in your inbox every day!

WRITE A COMMENT
 
x