Published : 16 Feb 2018 07:08 am

Updated : 16 Feb 2018 11:41 am

 

Published : 16 Feb 2018 07:08 AM
Last Updated : 16 Feb 2018 11:41 AM

பழனிசாமி அரசின் ஓராண்டு நிறைவு: ஜெயலலிதா பிறந்தநாளுடன் சேர்த்து கொண்டாட திட்டம்

தமிழக முதல்வராக கே.பழனிசாமி பதவியேற்று இன்றுடன் ஓராண்டு நிறைவு பெறுகிறது. ஜெயலலிதா பிறந்தநாளுடன் சேர்த்து இதை கொண்டாட திட்டமிடப்பட்டுள்ளது.

கடந்த 2016-ம் ஆண்டு நடந்த சட்டப்பேரவைத் தேர்தலில் வெற்றி பெற்று, ஜெயலலிதா 6-வது முறையாக முதல்வராக பொறுப்பேற்றார். அதே ஆண்டு டிசம்பர் 5-ம் தேதி உடல்நலக்குறைவால் அவர் காலமானார். இதையடுத்து, ஓ.பன்னீர்செல்வம் தலைமையில் புதிய அமைச்சரவை பதவியேற்றது.


அதிமுகவின் தற்காலிக பொதுச்செயலாளராக தேர்ந்தெடுக்கப்பட்ட சசிகலாவை முதல்வராக்கும் முயற்சிகள் நடந்து வந்தன. இதையடுத்து கடந்த ஆண்டு பிப்ரவரி 5-ம் தேதி முதல்வர் பதவியை ஓ.பன்னீர்செல்வம் ராஜினாமா செய்தார். அன்றே அதிமுக சட்டப்பேரவை கட்சித் தலைவராக சசிகலா தேர்வு செய்யப்பட்டார். பின்னர், ஆளுநரை சந்தித்து ஆட்சியமைக்க உரிமை கோரினார்.

ஆனால், சொத்து குவிப்பு வழக்கின் முடிவுக்காக காத்திருந்த அப்போதைய ஆளுநர் வித்யாசாகர் ராவ், சசிகலாவை உடனடியாக ஆட்சியமைக்க அழைக்கவில்லை. அடுத்த 2 நாளில் பிப்.7-ம் தேதி இரவு ஜெயலலிதா சமாதியில் திடீர் தியானம் மேற்கொண்ட ஓ.பன்னீர்செல்வம், சசிகலாவுக்கு எதிரான தர்மயுத்தத்தை தொடங்கினார். அவருக்கு ஆதரவாக 10 எம்எல்ஏக்கள் திரண்டனர். இதையடுத்து, சசிகலா ஆதரவு எம்எல்ஏக்கள் அனைவரும் கூவத்தூர் விடுதியில் தங்கவைக்கப்பட்டனர்.

இந்நிலையில், பிப்.14-ம் தேதி சொத்து குவிப்பு வழக்கில் சசிகலா குற்றவாளி என தீர்ப்பு வந்து, அவர் சிறை செல்ல நேரிட்டது. அப்போதுதான், கூவத்தூரில் தங்கியிருந்த எம்எல்ஏக்கள் இணைந்து கே.பழனிசாமியை சட்டப்பேரவை கட்சித் தலைவராக தேர்வு செய்தனர். பிப்.15-ம் தேதி சசிகலா பெங்களூரு சிறைக்குச் சென்றார். மறுநாள் (பிப்.16) ஆளுநர் மாளிகையில் நடந்த நிகழ்ச்சியில் தமிழக முதல்வராக கே.பழனிசாமி பதவியேற்றார்.

பிப்ரவரி 18-ம் தேதி சட்டப்பேரவையில் நடந்த பெரும்பான்மை வாக்கெடுப்பில் வெற்றி பெற்ற முதல்வர் கே.பழனிசாமி, பிப்.20-ம் தேதி முதல்வராக ஜெயலலிதா இருந்த அறையில் பொறுப்பேற்றார். அன்றே, பெண்களுக்கு 50 சதவீத மானியத்தில் இருசக்கர வாகனம், கூடுதலாக 500 டாஸ்மாக் கடைகள் மூடல், மகப்பேறு திட்ட நிதியுதவியை ரூ.18 ஆயிரமாக உயர்த்துதல், மீனவர்களுக்கு 5 ஆயிரம் வீடுகள், வேலைவாய்ப்பற்ற இளைஞர்களுக்கான மாதாந்திர உதவித்தொகையை 2 மடங்காக உயர்த்துதல் ஆகிய 5 கோப்புகளில் கையொப்பமிட்டார்.

அதன்பின், சசிகலா - ஓபிஎஸ் அணிகளுக்கிடையே கருத்து மோதல்கள் தொடர்ந்தன. இதற்கிடையே, பழனிசாமி, டிடிவி தினகரன் இடையே கருத்து வேறுபாடு ஏற்பட்டது. இதையடுத்து, ஓபிஎஸ் அணியை இணைக்க பழனிசாமி முயற்சிகள் மேற்கொண்டார். கடந்த ஆகஸ்ட் 21-ல் இரு அணிகளும் இணைந்தன. அதிமுக கட்சியும், இரட்டை இலை சின்னமும் அவர்களுக்கு மீண்டும் கிடைத்தது.

முதல்வராக கே.பழனிசாமி பதவியேற்று இன்றுடன் (பிப்.16) ஓராண்டு நிறைவு பெறுகிறது. வரும் பிப்.24-ம் தேதி ஜெயலலிதா பிறந்தநாள் வருவதால் அத்துடன் ஆட்சியின் ஓராண்டு நிறைவையும் சேர்த்து கொண்டாட திட்டமிட்டுள்ளதாக அதிமுக வட்டாரங்கள் தெரிவித்தன.


Sign up to receive our newsletter in your inbox every day!

You May Like

More From This Category

More From this Author