புதிய பென்சன் திட்டம் ரத்து உள்ளிட்ட கோரிக்கைகளுக்காக சென்னையில் டிஆர்இயு ஆர்ப்பாட்டம்

சென்னை: புதிய பென்சன் திட்டத்தை ரத்து செய்ய வேண்டும் என்பது உள்பட பல்வேறு கோரிக்கைகளை வலியுறுத்தி தட்சிண ரயில்வே தொழிலாளர்கள் சங்கம் (டிஆர்இயு) சார்பில், சென்னையில் நேற்று ஆர்ப்பாட்டம் நடைபெற்றது.

புதிய பென்சன் திட்டத்தை ரத்து செய்ய வேண்டும், ரயில்வே தனியார்மயத்தை தடுத்து நிறுத்த வேண்டும் உள்ளிட்ட கோரிக்கைகளை வலியுறுத்தி, டிஆர்இயு சார்பில், பெரும் திரள் ஆர்ப்பாட்டம் சென்னை மூர்மார்க்கெட் வளாகம் முன்பு நேற்று நடைபெற்றது. ஆர்ப்பாட்டத்தை சிஐடியு மாநிலத் தலைவர் அ.சவுந்தரராஜன் தொடங்கி வைத்தார்.

பிறகு செய்தியாளர்களிடம் அ.சவுந்தரராஜன் கூறியதாவது: பொதுத்துறையை தனியாருக்கு தாரை வார்க்கும் முயற்சியை மத்திய அரசு கைவிட வேண்டும். பழைய பென்சன் திட்டத்தில் ஒரு ஊழியர் ஓய்வுபெறும்போது, கடைசியாக வாங்கிய சம்பளத்தில் பாதி அளவு ஓய்வூதியமாக பெறும் நிலை இருந்தது. ஆனால், புதிய பென்சன் திட்டத்தில் இந்த உரிமை இல்லை.

மாறாக, பங்குசந்தையில் முதலீடு செய்து, அதில் கிடைக்கும் லாப நஷ்டத்தை வைத்து பென்சன் கொடுக்கப்படும் என்று கூறுகின்றனர். இத்திட்டத்தை முழுமையாக எதிர்க்கிறோம். ஏற்கெனவே, பல மாநிலங்களில் உள்ள அரசுகள் இந்த புதிய பென்சன் திட்டத்தை ஏற்க மாட்டோம் என்று அறிவித்துவிட்டனர். இதுபோல, தமிழகத்திலும் வரவேண்டும் என்றார்.

ஆர்ப்பாட்டத்தில் தட்சிண ரயில்வே பென்சனர் சங்கத் தலைவர் இளங்கோவன் பேசும்போது, “புதிய பென்சன் திட்டத்தில் ஓய்வூதியம் பெறும்போது, ரூ.23 ஆயிரத்துக்கு பதிலாக ரூ.2,300 தான் பெற முடியும். புதிய பென்சன் திட்டத்தில் தொழிலாளர்களுக்கு எந்த நன்மையும் இல்லை.

தனியார்மயம், இந்திய ஏழை எளிய மக்களுக்கு ரயில் பயணத்தை எட்டாமல் செய்துவிடும். பயணச்சீட்டுக்கு கொடுக்கப்படும் மானியங்களை தனியார்மயம் ஒழித்துவிடும். எனவே, தனியார் மயமாக்குதலை கைவிட வேண்டும்" என்றார்.

டிஆர்இயு தலைவர் சுகுமாறன், செயல் தலைவர் ஏ.ஜானகிராமன், பொதுச் செயலாளர் ஹரிலால் உள்பட பலர் பேசினர்.