மீன்வளத் துறை சார்பில் ரூ.134 கோடியில் மீன் இறங்குதளங்கள்: முதல்வர் ஸ்டாலின் திறந்து வைத்தார்

சென்னை: மீன்வளத் துறை சார்பில் ரூ.134.29 கோடியில் அமைக்கப்பட்டுள்ள 6 புதிய மீன் இறங்குதளங்கள், 4 மேம்படுத்தப்பட்ட மீன் இறங்குதளங்களை முதல்வர் ஸ்டாலின் திறந்து வைத்தார். இதுகுறித்து தமிழக அரசு வெளியிட்ட செய்திக்குறிப்பு: ராமநாதபுரம் மாவட்டம் - மண்டபம் வடக்கு பகுதியில் ரூ.30 கோடியிலும், மயிலாடுதுறை - சின்னமேடு கிராமத்தில் ரூ.9.78 கோடியிலும் தூண்டில்வளைவுடன் மீன் இறங்குதளம் மேம்படுத்தப்பட்டுள்ளது. செங்கல்பட்டு - கோவளம் கிழக்கு கிராமத்தில் ரூ.3கோடியிலும், தூத்துக்குடி - கீழவைப்பாறில் ரூ.10 கோடியிலும் மீன் இறங்குதளம் மேம்படுத்தப்பட்டுள்ளது.

அதேபோல, ராமநாதபுரம் - தங்கச்சிமடத்தில் ரூ.8.95 கோடி, கன்னியாகுமரி - கீழமணக்குடியில் ரூ.29.50 கோடி, செங்கல்பட்டு - பழைய நடுக்குப்பம், புதுநடுக்குப்பத்தில் தலா ரூ.11 கோடி, கடலூர் - தாழங்குடாவில் ரூ.13.06 கோடி, மயிலாடுதுறை - வானகிரியில் ரூ.8 கோடியில் புதியமீன் இறங்கு தளம் அமைக்கப்பட்டுள்ளன.

இவ்வாறு மொத்தம் ரூ.134.29 கோடியில் அமைக்கப்பட்டுள்ள 6 புதிய மீன் இறங்குதளங்கள், 4 மேம்படுத்தப்பட்ட இறங்குதளங்களை முதல்வர் ஸ்டாலின் நேற்றுகாணொலி மூலம் திறந்து வைத்தார்.

இதுதவிர, ஜெ.ஜெயலலிதா மீன்வளபல்கலைக்கழகத்தின்கீழ் செயல்படும் தூத்துக்குடி மீன்வள கல்லூரி, ஆராய்ச்சி நிலையத்தில், மாணவர்களுக்கான 29 தங்கும் அறைகள் உள்ளிட்ட வசதிகளுடன்ரூ.7.15 கோடியில் கட்டப்பட்ட மாணவர் விடுதி கட்டிடம், நாகப்பட்டினம் - தலைஞாயிறு டாக்டர் எம்ஜிஆர் மீன்வள கல்லூரி,ஆராய்ச்சி நிலையத்தில் ரூ.4.50 கோடியில் கட்டப்பட்டுள்ள நிர்வாக கட்டிடம் என ரூ.11.65 கோடியில் கட்டப்பட்டுள்ள கட்டிடங்களையும் முதல்வர் திறந்து வைத்தார்.

காவல்துறை கட்டிடங்கள்: அதேபோல, காவல்துறைக்கு ரூ.18.20 கோடி மதிப்பில் கட்டப்பட்டுள்ள கட்டிடங்களையும் முதல்வர் மு.க.ஸ்டாலின் திறந்துவைத்தார். ஆனைமலை, குமாரபாளையயத்தில் ரூ. 8.78 கோடியில் 62 காவலர் குடியிருப்புகள் உட்பட ரூ.18.20 கோடியில் கட்டப்பட்டுள்ள கட்டிடங்களை முதல்வர் ஸ்டாலின் காணொலி வாயிலாக நேற்று திறந்து வைத்தார்.