சென்னை: அதிமுக பொதுச்செயலாளர் பழனிசாமி தலைமையில் வரும் டிச.18-ம் தேதி கிறிஸ்துமஸ் நிகழ்ச்சி நடைபெறுகிறது. இதுகுறித்து அதிமுக தலைமை அலுவலகம் வெளியிட்ட செய்திக்குறிப்பு: மறைந்த முன்னாள் முதல்வர் ஜெயலலிதா, அதிமுக சார்பில் ஆண்டுதோறும் கிறிஸ்தவ மக்களை கவுரவிக்கும் விதமாக கிறிஸ்துமஸ் விழாவை நடத்தி வந்தார். அந்தவகையில் இந்த ஆண்டும் அதிமுக சார்பில் பொதுச்செயலாளர் பழனிசாமி தலைமையில் கிறிஸ்துமஸ் விழா நடத்தப்படுகிறது. சென்னை வானகரம் ஜீசஸ்கால்ஸ் வளாகத்தில் அமைந்துள்ள விங்க்ஸ் கன்வென்ஷன் சென்டரில் டிச.18-ம் தேதி மாலை 5 மணிக்கு கிறிஸ்துமஸ் நிகழ்ச்சி நடைபெறுகிறது. இந்நிகழ்ச்சியில், கிறிஸ்தவ பேராயர்கள், ஆயர்கள், போதகர்கள் மற்றும் கிறிஸ்தவ பெருமக்களும் அதிமுக நிர்வாகிகள், மாவட்டச் செயலாளர்கள், நாடாளுமன்ற, சட்டப்பேரவை உறுப்பினர்கள், முன்னாள் அமைச்சர்கள் உள்ளிட்டோரும் பங்கேற்கின்றனர். இவ்வாறு அதில் கூறப்பட்டுள்ளது.