பதிவுத்துறை சந்தை வழிகாட்டி மதிப்பு சீரமைப்புக்குழுவின் உயர்மட்ட தலைவராக ஓய்வுபெற்ற ஐஏஎஸ் அதிகாரி நியமனம்

சென்னை: பதிவுத்துறை சந்தை வழிகாட்டி மதிப்பு சீரமைப்புக்குழுவின் முதல்அடுக்கு உயர்மட்டக்குழு தலைவராக ஓய்வுபெற்ற ஐஏஎஸ் அதிகாரி ஆர். வாசுகி நியமிக்கப்பட்டுள்ளார்.

இதுதொடர்பாக வணிகவரி மற்றும் பதிவுத்துறை செயலாளர் பா.ஜோதி நிர்மலாசாமி வெளியிட்டஅரசாணையில் கூறியிருப்பதாவது:

பதிவுத்துறையில் பின்பற்றப்படும் சொத்துகளுக்கான சந்தைவழிகாட்டி மதிப்பை சீரமைக்க, சந்தை வழிகாட்டி மதிப்பு தொடர்பாக களநிலவரம் பற்றி ஆராய்ந்துவழிகாட்டி மதிப்பை நிர்ணயிப்பதற்கான வழிமுறைகளை பரிந்துரைக்க ஓர் உயர்மட்டக்குழு அமைக்கப்படும் என்று 2021-2022-ம்ஆண்டு நிதிநிலை அறிக்கையில் அறிவிக்கப்பட்டது.

அதன்படி, இரு அடுக்குகளுடன் (முதல் அடுக்கு - உயர்மட்டக்குழு, இரண்டாவது அடுக்கு - வழிகாட்டும் குழு) கூடிய சந்தை வழிகாட்டி மதிப்பு சீரமைப்புக்குழு அமைக்கப்பட்டு அரசாணை வெளியிடப்பட்டன. சந்தை வழிகாட்டி மதிப்பு சீரமைப்புக்குழுவின் முதல்அடுக்கு உயர்மட்டக்குழு தலைவராக ஓய்வுபெற்ற ஐஏஎஸ் அதிகாரி ஜோதி ஜெகநாதன் கடந்த மே மாதம் 22-ம் தேதி பொறுப்பேற்றுக் கொண்டார். பின்னர், தனிப்பட்ட காரணங்களுக்காக ஜூலை 3-ம் தேதி அப்பொறுப்பில் இருந்து ராஜினாமா செய்தார்.

இந்நிலையில், அப்பொறுப்பில்ஓய்வுபெற்ற ஐஏஎஸ் அதிகாரிஆர்.வாசுகி நியமனம் செய்யப்பட்டுள்ளார். சந்தை வழிகாட்டி மதிப்புசீரமைப்புக்குழுவின் முதல் அடுக்கு உயர்மட்டக்குழு தலைவராக ஆர்.வாசுகி கடந்த 1-ம் தேதி பொறுப்பேற்றுக் கொண்டார். அவரது தலைமையிலான உயர்மட்ட குழுவானது வழிகாட்டி மதிப்பில் உள்ள முரண்பாடுகளை தீவிரமாக ஆராய்ந்து அதனை நேர் செய்யஉரிய பரிந்துரைகளை பதிவுத்துறைக்கு அளிக்கும் என்பது குறிப்பிடத்தக்கது.