ஆண்டாள் சர்ச்சை தொடர்பாக நாமக்கல்லில் பேசிய ஸ்ரீவில்லிபுத்தூர் கோயிலின் சடகோப ராமானுஜ ஜீயர் "தேவைப்பட்டால் நாங்களும் சோடாபாட்டில் வீசுவோம்" என ஆவேசமாக பேசியுள்ளார்.
ராஜபாளையத்தில் நடந்த நிகழ்ச்சி ஒன்றில் 'தமிழை ஆண்டாள்' என்ற தலைப்பில் பேசிய கவிஞர் வைரமுத்து, ஆண்டாளை அவமதித்ததாகக் கூறி தொடர்ந்து இந்து அமைப்புகள் பல அவருக்கு கண்டனம் தெரிவித்துவருகின்றன.
வைரமுத்து இதுதொடர்பாக தனது ட்விட்டர் பக்கத்திலும் வருத்தம் தெரிவித்திருந்தார். ஆனாலும், தொடர்ந்து அவர் மீது விமர்சனங்கள் முன்வைக்கப்படுகின்றன.
இந்நிலையில், ஸ்ரீவில்லிபுத்தூர் கோயிலின் சடகோப ராமானுஜ ஜீயர் உண்ணாவிரதம் இருந்தார். ஒரே நாளில் தனது உண்ணாவிரதத்தை முடித்துக்கொண்ட அவர் வரும் பிப்ரவரி 3-ம் தேதிக்குள் வைரமுத்து ஸ்ரீவில்லிபுத்தூர் ஆண்டாள் கோயிலுக்குவந்து மன்னிப்பு கேட்க வேண்டும் என கெடு விதிதிருக்கிறார்.
அவ்வாறு, வைரமுத்து மன்னிப்பு கேட்காவிட்டால், நானும் ஆண்டாள் பக்தர்களும் ஒன்று திரண்டு கோயில் முன் மீண்டும் சாகும்வரை உண்ணாவிரதப் போராட்டத்தை தொடங்குவோம். ஆண்டாளுக்காக உயிரை விடவும் நாங்கள் தயாராக உள்ளோம் எனக் கூறியிருந்தார்.
இந்நிலையில், நேற்று (வெள்ளிக்கிழமை) நாமக்கல்லில் நிகழ்ச்சி ஒன்றில் கலந்து கொண்டு பேசிய சடகோப ராமானுஜ ஜீயர், "ஆண்டாளை அவதூறாக பேசிய வைரமுத்து ஆண்டாள் சன்னதிக்கு வந்து மன்னிப்பு கேட்க வேண்டும். வைரமுத்து மன்னிப்பு கேட்கும்வரை நாம் அறவழியில் போராடுவோம்.
ஆண்டாளின் பிள்ளைகளான உங்கள் அனைவருக்கும் நான் ஒரு கோரிக்கையை முன்வைக்கிறேன். எந்த ஒரு கடவுளையும் இனி யாரும் மேடை போட்டு அவதூறாக பேசக் கூடாது. அவ்வாறு பேசினால் நாம் அங்கு சென்று போராடுவோம்.
நான் உங்களுக்கு அழைப்பு விடுக்கும்போது நான் சொல்வதுபோல் செய்யுங்கள். இந்தக்கால சாமியார் எல்லாம் சும்மா உட்கார்ந்திருக்க மாட்டார்கள். இப்போதெல்லாம் தேவைப்பட்டால் நாங்களும் கண்ணாடி விடுவோம்.. எங்களுக்கும் சோடா பாட்டில் வீசத் தெரியும்... எல்லாவற்றையும் வெளிப்படையாக சொல்லிவிடுவோம். ஆனால், நாம் அப்படி செய்யக்கூடாது. நாம் அறவழியில் போராட வேண்டும்" என்று பேசினார்.
ஜீயரின் இந்த பேச்சு சர்ச்சையைக் கிளப்பியுள்ளது.