நன்னடத்தை காலத்தில் மகப்பேறு விடுப்பு எடுத்தால் பணியில் இருந்ததாக கருத முடியாது: உயர் நீதிமன்றம் உத்தரவு

சென்னை: நன்னடத்தை காலத்தில் மகப்பேறு விடுப்பு எடுத்தால் பணியில் இருந்ததாகக் கருத முடியாது என சென்னை உயர் நீதிமன்றம் உத்தரவிட்டுள்ளது.

சென்னை உயர் நீதிமன்றத்தில் துணை வட்டாட்சியர் எஸ்.நாகஜோதி என்பவர் தாக்கல் செய்த மனுவில் கூறியிருப்பதாவது: தமிழக அரசு பணியில் உதவியாளராக சேர்ந்து துணை தாசில்தாராக கடந்த 2019-ம் ஆண்டு பதவிஉயர்வு பெற்றேன். இதன்பின்னர் 2 ஆண்டுகள் எனக்கு நன்னடத்தைகாலமாகும். இந்த நன்னடத்தை காலத்தில் 9 மாதங்கள் மகப்பேறுகால விடுப்பு எடுத்தேன். நன்னடத்தை காலம் 2021 ஏப். 6-ம் தேதிமுடிவடைந்தது. இதன்பின்னர், சென்னை ஆட்சியர் தயாரித்த பணி மூப்பு பட்டியலில் என்பெயர் இடம் பெறவில்லை. மகப்பேறு கால விடுப்பை அவர் பணியில் இருந்ததாக கருதாமல் பட்டியல் தயாரித்துள்ளார். இதனால், என்னைவிட இளநிலை நிலையில் உள்ளவர்கள் தாசில்தாராக பதவிஉயர்வு பெற்று விட்டனர். எனவே,ஆட்சியர் தயாரித்த பணி மூப்பு பட்டியலை ரத்து செய்ய வேண்டும். இவ்வாறு கூறப்பட்டிருந்தது.

இவ்வழக்கில், அரசு தரப்பில் வழக்கறிஞர் எம்.அழகு கவுதம் ஆஜராகி வாதிட்டார். இருதரப்பு வாதங்களையும் கேட்ட நீதிபதி என்.சதீஷ்குமார் பிறப்பித்த உத்தரவில் கூறியிருப்பதாவது: தமிழ்நாடு விடுப்பு விதிகளின்படி கடந்த 2020-ம் ஆண்டு அரசு பிறப்பித்த அரசாணையில், நன்னடத்தை காலத்தில் அரசு ஊழியர் விடுப்புஎடுத்தால் அந்த நன்னடத்தை காலத்தில் பணியில் இருந்ததாக கருத முடியாது என்று கூறப்பட்டுள்ளது. நன்னடத்தை காலம் என்பது வெறும் சம்பிரதாயமாக பார்க்க முடியாது. அந்த காலத்தில், பல்வேறு தேர்வுகளை அவர்கள் எதிர்கொள்ள வேண்டும். அதில் தேர்ச்சி பெற்றால்மட்டுமே, அவர்களுக்கு பதவி உயர்வு உறுதி செய்து, நிரந்தரமாக்கப்படும். எனவே, சென்னை ஆட்சியரின் உத்தரவில் எந்த தவறும் இருப்பதாக தெரியவில்லை. இந்த வழக்கை தள்ளுபடி செய்கிறேன். இவ்வாறு உத்தரவிட்டார்.