Published : 13 Nov 2017 08:45 am

Updated : 13 Nov 2017 08:45 am

 

Published : 13 Nov 2017 08:45 AM
Last Updated : 13 Nov 2017 08:45 AM

சசிகலா உறவினர் ராவணனை சுற்றி புது சர்ச்சை: முதல்வர் அணியுடன் இணக்கத்தினால் வருமான வரி சோதனையில் தப்பினாரா?

‘சசிகலா குடும்ப உறவுகள், நட்புகள், சட்ட ஆலோசகர்கள் உள்ளிட்டோரின் வீடுகள் வருமான வரி அதிகாரிகளால் சோதனைக்கு உள்ளாக்கப்பட்ட நிலையில், இவரது எந்த ஒரு இருப்பிடத்திலும் சோதனை நடக்காதது ஆச்சரியமாக உள்ளது’.

இப்படியொரு எண்ணம் கோவை அதிமுகவினரிடையே எழுந்துள்ளது. இந்த பேச்சின் கதாநாயகர் சசிகலாவின் சித்தப்பா டாக்டர் கருணாகரனின் மருமகன் ராவணன். அதிமுக அரசியலில் முழுமையாக தன்னை ஈடுபடுத்திக் கொண்டிருந்த சசிகலா குடும்பத்தாரில் சோதனையில் சிக்காத சொற்ப நபர்களில் இவரும் ஒருவர் என்பதுதான் கட்சிக்காரர்கள் மத்தியில் பேசப்படும் செய்தி.


இதன் பின்னணி பற்றி தெரிந்து கொள்ளும் முன் ராவணன் குறித்த ஒரு ஃபிளாஷ்பேக்: ராவணனுக்கு கோவை, திருச்சி சாலையில் ராமநாதபுரம் ஐயர் ஆஸ்பத்திரி எதிரே சின்ன பங்களா உள்ளது. அதில் 1996-ம் ஆண்டு முதல் வசித்து வருகிறார். இங்கிருந்து மேற்கே 3 கி.மீ தூரம் உள்ள சுங்கம் பை-பாஸ் சாலையின் இடதுபுறம் ஒதுக்குப்புறமாக ஒரு குடோன் உண்டு. இந்த குடோனில் ஆரம்பத்தில் ஒரு ஆயில் கம்பெனி நடந்து வந்தது. அது பின்னர் கோவை, திருப்பூர், நீலகிரி, ஈரோடு, நாமக்கல், சேலம், தருமபுரி, கிருஷ்ணகிரி என ஒட்டுமொத்த கொங்கு மண்டல அதிமுக முக்கிய நிர்வாகிகள் வந்து செல்லும் இடமாக மாறிப் போனது.

கட்சியின் முக்கிய நிர்வாகிகள் சிலர், சில நாட்கள் மட்டும் இங்கு வருவார்கள். வந்த சுவடு தெரியாமல் சில மணி நேரங்களில் சென்றுவிடுவார்கள். அவர்கள் அப்போது சந்தித்ததெல்லாம் ராவணனைத்தான் என பேசப்படுவதுண்டு. 2003-04-ம் ஆண்டுகளில் கொங்கு மண்டல அதிமுகவில் மாவட்டச் செயலாளர்கள் மாற்றம், மக்களவைத் தேர்தலுக்கு வேட்பாளர்களுக்கான ரகசிய நேர்காணல் எல்லாம் இங்கேதான் நடந்தன.

அதன்பிறகுதான், ‘ராவணன் சசிகலாவின் சித்தப்பா மருமகன். கோவை விவசாயப் பல்கலைக்கழகத்தில் படித்தவர். முன்னாள் அமைச்சர் அக்ரி கிருஷ்ணமூர்த்தியும் இவரும் கல்லூரி கால நண்பர்கள். மிடாஸ் மதுபான ஆலையின் இயக்குநர்களில் ஒருவர். கோடநாடு விவகாரங்களை இவரே கவனிக்கிறார். அங்கே மேலாளராக இவருடைய உறவுக்காரரே இருக்கிறார்’ என்பன போன்ற விவரங்களையெல்லாம் கட்சிக்காரர்கள் பேசத் தொடங்கினர்.

ராவணன் மீது புகார்

2004 மக்களவைத் தேர்தல் தோல்வி, 2006-ம் ஆண்டு சட்டப்பேரவைத் தேர்தலில் ஆட்சியிழப்புக்கு பிறகு அதிமுகவில் கட்சிக்குள்ளேயே பெரும் சரிவு ஏற்பட்டது. அப்போது புதிது புதிதாக கட்சி நிர்வாகிகள் அறிவிக்கப்பட்டனர். உள்ளாட்சி மன்ற தேர்தல்களில் வேட்பாளர்கள் பட்டியல் வெளியிடப்பட்டது. அதில் கொங்கு மண்டலத்தில் இடம் பிடித்தவர்கள் எல்லாம் ராவணனால் தேர்வு செய்யப்பட்டவர்களே என்றனர் அதிமுகவினர். அதேநேரம் ராவணன் மீது பல புகார்கள் கட்சி தலைமைக்கும் சென்றன.

அதன் உச்சகட்டமாக ஜெயலலிதாவின் ஆஸ்தான ஜோதிடர் ஒருவரை கடத்திச்சென்று பல நாட்கள் ஓர் அறையில் அடைத்து மிரட்டி, அவரது நிலங்களை அபகரித்துக் கொண்டதாக போலீஸில் புகார் ஆகி, அதில் ராவணன் தலைமறைவான சம்பவமும் பத்திரிகைகளில் செய்திகளாயின. ஆனால் 2011 சட்டப்பேரவை தேர்தலின்போது அதிமுக வேட்பாளர் தேர்வில் மீண்டும் வெளிச்சத்துக்கு வந்தார். அதன் பிறகு சசிகலா குடும்பத்தினர் மீது பல்வேறு புகார்கள் வந்து பலரும் போலீஸில் சிக்க, அதில் ராவணனும் கைதானார். சசிகலா கார்டனில் இருந்து வெளியேற்றப்பட்டார்.

ஒரு கட்டத்தில் சசிகலா கார்டனில் திரும்ப அழைக்கப்பட்டு, இவர்கள் மீதான நெருக்கடிகள் தளர்த்தப்பட்டன. ராவணனும் விடுதலையானார். அதன் பிறகு பல்வேறு இடங்களில், பல்வேறு முறைகளில் சசிகலா உறவுகள் அதிமுக அரசியலுக்குள் திரைமறைவில் புகுந்து வெளிப்பட்டாலும், ராவணன் எங்கிருக்கிறார் என்பதே தெரியாமல் இருந்தது.

அதன் பிறகு, தற்போது சசிகலா குடும்பத்தினர், அவரது நெருக்கமானவர்கள் வீடுகளில் வருமான வரி அதிகாரிகள் சோதனை என்ற செய்தி வந்தபோதுதான் இவரின் பெயரும் அடிபட்டது. பிறகு அதுவும் சுவடு தெரியாமல் காணாமல் போனது. இதையொட்டித்தான் கோவை அதிமுகவினர் மற்றும் ராவணனுக்கு நெருக்கமான வட்டாரத்தில், அவர், முதல்வர் பழனிசாமி அணியுடன் தோழமை கொண்டதால்தான் இந்த ரெய்டில் இருந்து தப்பித்திருக்கிறார் என்ற பேச்சு அடிபட்டது.

இதுகுறித்து ராவணனுடன் நெருக்கமாக இருந்த பிரமுகர் ஒருவர் நம்மிடம் பேசும்போது, ‘ஆரம்ப காலத்தில் ராவணன் கார்டனில் 4, 5-ம் நபராகத்தான் இருந்தார். மெதுவாக சசிகலாவிடம் நம்பிக்கையை சம்பாதித்து 3-ம் இடத்துக்கு வந்தார். அப்போது ஜெயலலிதாவிடம் இருந்து உத்தரவுகள் சசிகலாவிடமும், சசிகலாவிடம் இருந்து திவாகரனுக்கும், திவாகரனிடம் இருந்து ராவணனுக்கும் போகும். பிறகு ஜெயலலிதாவிடம் இருந்து சசிகலாவுக்கு, அவரிடம் இருந்து ராவணனுக்கு என மாறியது. இதுவே 2011 ஆட்சிக்கு பிறகு ஜெயலலிதா உத்தரவு நேரடியாக ராவணனுக்கு செல்ல ஆரம்பித்தது. அதில்தான் வந்தது சிக்கல்.

உளவுத்துறையால் ஆபத்து

2012-ல் ஒருமுறை பெங்களூரு வழக்கு முடிவுக்கு வரும் சூழல் ஏற்பட்டது. தீர்ப்பு பாதகமாக வந்தால் யாரை முதல்வர் ஆக்குவது என்ற பேச்சு சசிகலா குடும்பத்தினர் மத்தியில் எழுந்தது. இந்த முறை ஓபிஎஸ் வேண்டாம். அவர் மறுபடி முதல்வரானால் தன்னை ஸ்தாபித்துக் கொள்வார் என்பதால் குடும்பத்தினரில் ஒருவரே பதவி ஏற்பது என்று பேச்சு நடந்துள்ளது.

அப்போது இருந்த எம்எல்ஏக்கள், அமைச்சர்களில் பெரும்பான்மையானோர் ராவணனால் தேர்வு செய்யப்பட்டவர்களே. எனவே, அவர் இதில் முக்கிய இடம் பெற்றிருக்கிறார். இந்த பேச்சுகளையெல்லாம் அப்போதைய உளவுத்துறை உயர் அதிகாரி ரெக்கார்டிங் ஆதாரத்துடன் கொண்டு போய் ஜெயலலிதாவிடம் கொடுத்துவிட்டார். அந்த ஆதாரத்தில் நீக்கமற நிறைந்திருந்தவர் ராவணன்தான் என்று கூறப்பட்டது.

அந்த கோபத்தில்தான் சசிகலா குடும்பத்தின் மீதே நடவடிக்கை எடுத்தார் ஜெயலலிதா. அதற்கு பிறகு சசிகலா இணக்கமாகி போயஸ் கார்டனுக்கு திரும்பிய பிறகும், அவர்கள் குடும்பத்தினர் ராவணனை நம்பவில்லை. ஜெயலலிதா இறுதி அஞ்சலி செலுத்த வந்தவரைகூட ஓரமாகவே நிறுத்தினர். சிறை சென்ற பின்பு ஒரே ஒருமுறை மட்டும் பெயரளவில் சசிகலா பார்க்க அனுமதித்தார். ஒரு வாரத்துக்கு முன்பு கொங்கு மண்டல அமைச்சர் ஒருவரை சந்தித்தாராம் ராவணன். அந்த அமைச்சர், முதல்வர் பழனிசாமி உள்ளிட்டோர், அக்காலகட்டத்தில் அவர் வளர்த்து விட்ட ஆட்கள்தானே? எனவே அந்த அமைச்சர் மூலம் என்ன பேச்சுவார்த்தை நடந்ததோ, இப்போது இவர் இருப்பிடங்களில் மட்டும் ரெய்டு இல்லை!’ என்றார்.

இதுகுறித்து இன்னொரு அதிமுக பிரமுகர் பேசும்போது, ‘2012-ல் கைது செய்யப்பட்டபோதே ராவணனிடம் இருந்த அத்தனையும் மிரட்டி எழுதி வாங்கிட்டாங்க. அதனால அவர்கிட்ட ஒண்ணுமில்ல. அதனால ரெய்டும் இல்லைன்னு நினைக்கிறோம்!’ என்றார்.


Sign up to receive our newsletter in your inbox every day!

You May Like

More From This Category

More From this Author