சென்னை: முதல்வர் கோப்பைக்கான மாநில அளவிலான விளையாட்டுப் போட்டி சென்னையில் ஜுலை 1-ம் தேதி முதல் ஜுலை 25-ம் தேதி வரை நடைபெறுகிறது.
தமிழக விளையாட்டு மேம்பாட்டு ஆணையத்தின் சார்பில், முதல்வர் கோப்பைக்கான மாநில அளவிலான விளையாட்டுப் போட்டி சென்னையில் 17இடங்களில் ஜுலை 1-ம் தேதி முதல் ஜுலை 25-ம் தேதி வரை நடைபெறுகிறது.
இதன் தொடக்க விழா நேரு உள் விளையாட்டு அரங்கத்தில் வரும் 30-ம் தேதி நடைபெறுகிறது. விழாவுக்கு இளைஞர்நலன் மற்றும் விளையாட்டு மேம்பாட்டுத் துறை அமைச்சர் உதயநிதி தலைமை வகிக்கிறார்.
இப்போட்டிகளில் 27,000-க்கும் மேற்பட்ட வீரர்-வீராங்கனைகள் பங்கேற்கஉள்ளனர். பயிற்றுநர்கள், நடுவர்கள், அலுவலர்கள் மற்றும் தேசிய மாணவர் படை தன்னார்வலர்கள் அனைவருக்கும் போட்டி நடைபெறுகின்ற அனைத்து நாட்களிலும் தங்குவதற்கு வசதியாக சென்னையில் 2,000-க்கும் மேற்பட்ட அறைகள் மற்றும் மேலக்கோட்டையூரில் உள்ள தமிழக உடற்கல்வியியல் மற்றும் விளையாட்டு பல்கலைக்கழகத்தில் உள்ள மாணவ மாணவியர் விடுதிகளில் ஏற்பாடு செய்யப்பட்டுள்ளது. மேலும், போட்டி நடைபெறும் அனைத்து நாட்களிலும் உணவு மற்றும்சிற்றுண்டி வழங்க ஏற்பாடு செய்யப்பட்டுள்ளது.